भांगरभूंय | प्रतिनिधी
म्हापशें: चवथीचे परबे निमतान म्हापशें बाजारपेठ माटोळीच्या सामानान सजली. दोन दिसांचेर चवथ आयिल्ल्यान माटोळीचें साहित्य व्हड प्रमाणांत बाजारांत उपलब्ध जालां. अंदूं म्हापशें पालिकेन मार्केटाचे मुखेल पयाणींत माटोळी बाजाराचें नियोजन केलां.
आयतारा बाजारांत माटोळीचें साहित्य दाखल जालें. सदचे प्रमाण गिरायकांचो प्रतिसाद आसून सोमारा चवथीचे पूर्व सांजेक माटोळी खरेदी करपा खातीर गर्दी जावपाची शक्यताय विक्रेत्यांनी उक्तायली.
गोंयांत माटोळी सजयले बगर गणपतीच्या मुर्तीचें पुजन अपूर्ण आसता. घरांत श्रींची मूर्त पुजेक लायतात. चवथीच्या काळांत थोडेभोव पयशे मेळटले हे आशेन गांवगिऱ्या वाठारांतले लोक चड करून बायलां व्हड संख्येन रानवटी माटोळीचें साहित्य बाजारांत घेवन विक्रेक बसतात.
फाटले चवथीचे तुळेन अंदूं माटोळीचाे वेपार व्हड प्रमाणांत दाखल जाला. म्हापशें ही उत्तर गोंयची मोटी बाजारपेठ आशिल्ल्यान हांगा गिरायकांची व्हड संख्या आसता. ताका लागून विक्रेते व्हड संख्येन हांगा माटोळीचें साहित्य घेवन येतात.
मार्केटांत सुमार 300 परस चड माटोळी विक्रेते दाखल जाल्यात. हे खातीर म्हापशें पालिकेन देड बाय देड सुवात निश्चीत केल्या. तशेंच अतिरिक्त सुवातेचीय तरतूद पालिकेन करून दवरल्या.
लोक माटोळी साहित्या सयत, भाजीपालो, सजावटीचें साहित्य आनी कपडे खरेदी खातीर बाजारपेठेंत आयिल्ल्यान सद्या मार्केटांत गिरायकांची बरीच गर्दी जाल्या. सोमारा गर्दीची ही संख्या दुपेटीन-तिपेटीन जावपाची शक्यताय आसा.
पालिकेन माटोळी बाजारा खातीर खासा मार्केटांतूय वेवस्था केल्या. हे खातीर सुवातूय निश्चीत केल्या. शकुंतला पुतळ्या मुखा वेल्या रस्त्यार तीन रांगो करून विक्रेत्यांक बसयल्यात. तशेंच कुशीच्या दोनूय पायणींनी लेगीत माटोळी विक्रेत्यांची वेवस्था केल्या.
खरेदी खातीर लोक बाजारपेठेंत गर्दी करूंक लागिल्ल्यान मार्केटा मुखा वेल्या रस्त्यार वाहनांची गर्दी वाडल्या. चवथीचो माहोल शारांत निर्माण जाला. ऑनलायनीचो जमानो आशिल्ल्यान कांय माटोळी विक्रेत्यां कडेन गुगल-पेची वेवस्था लेगीत आसा.
माटोळी जिनसाचें मोल
सुपारीचे शिपटें 100 ते 600, देंवयिल्लो नाल्ल 100, कांगलां 50, मावळींग 100, घाघरी 50, माटा 50, तोरींग 100, हर्ना, 100, भाताचें कणस 100, कवडाळ 50, कारांदे 50, आंबाडे 50 (10 नग), केळीच्याे शिरत्यो 50, चिबूड 100, गांवठी तवशें 100, ऊस 30 (नग), केळीचाे फेणो 400, चिकू 20 (नग), अॅपल 150 ते 200 रु. कील, सीताफळ 30, मोसंबी 200 रु. कील, डाळींब 50 (नग), निरपणस 100, दुदी 100, अनस 50 ते 100.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
