भांगरभूंय | प्रतिनिधी
सुवात पुर्वपदार हाडपाच्या आदेशा उपरांतूय अडेज वर्सांनी दिलो दुकानाक परवानो
म्हापशें: कदंब बस स्टॅण्डाच्या प्रवासी विसव फ्लॅटफॉर्मार अतिक्रमण करून बेकायदो रितीन दुकान उबारिल्लें. गोवा कॅन हे संस्थेन हे विशीं येरादारी खात्या कडेन कागाळ करून लेगीत निमाणें अडेज वर्सांनी च्यायेचें दुकान उबारलें.
म्हापशें कदंब बस स्टॅण्डाची मालमत्ता येरादारी खात्याची आसा. खात्यान ही सुवात भाड्यान कदंब परिवहन म्हामंडळ लिमिटेडाक वापर आनी देखरेखी खातीर दिल्ली आसतना ह्या बस स्टॅण्डाच्या प्रवासी विसव फ्लॅटफॉर्म क्रमांक 5 चें बेकायदो कदंब म्हामंडळान एका दुकानांत रुपांतरीत केल्लें.
हे विशीं गोवा कॅनान ऑक्टोबर 2021 वर्सा जिल्हो रस्तो सुरक्षा समितीचे मुखेली जिल्होधिकाऱ्यां कडेन आनी उपरांत येरादारी खातें आनी कदंब म्हामंडळा सयत संबंदीत खातीं आनी प्राधिकरणां कडेन कागाळ केल्ली. प्रवाशां खातीर उक्तो आशिल्लो फ्लॅटफॉर्म क्रमांक पांचांत यरादारी खात्याचो परवानगी घेनासतना उपरोक्त मालमत्तेंत वेवसायीक दुकान (च्या स्टॉल) उबारत आशिल्ल्याचें कागाळी वरवीं संबंदितांचे नदरेक हाडून दिल्लें.
ते प्रमाण संबंदीत अधिकाऱ्यांनी जोड पळोवणी केल्ली. हें दुकान येता त्या 15 दिसांत कुशीक काडून सुवात पुर्ववत करची आनी गरजेची कार्यवाही करची. तशेंच वस्तुस्थिती दर्शक अहवाल सादर करचो असो आदेश येरादारी खात्याचे उपसंचालक नॅन्सी फर्नांडीस हांणी कदंब परिवहन म्हामंडळाच्या वेवस्थापकी संचालकाक जानेवारी 2022 वर्सा दिल्लो. तशेंच येरादारी खात्यान जानेवारी 2023 वर्सा लेगीत कदंब म्हामंडळाक ही सुवात पुर्वरत करपाचे निर्देश दिल्ले. पूण ह्या आदेशांची फाटलीं अडेज वर्सा कसलीच कार्यवाही जाली ना.
सोमारा 24 जून 2024 दिसा ह्या फ्लॅटफॉर्मार अतिक्रमण करून च्यायेचें दुकान सुरू केलें. ह्या प्रकारा विशीं गोवा कॅनचे समन्वयक रोलंड मार्टीन हांणी येरादारी खात्याच्या संचालकाक पत्र बरोवन नापसंती उक्तायल्या.
ह्या पत्राच्यो प्रती राज्याचे मुखेल सचीव, येरादारी आनी गिरायक वेव्हार सचीव, जिल्होधिकारी, उपजिल्होधिकारी, उजो पालोवपी दळाचे संचालक, नगर विकास खात्याचे संचालक, नागरी पुरवण खात्याचे संचालक, येरादारी पुलीस अधिक्षक आनी आपत्कालीन विभागाचे वांगडी सचीव हांकां धाडून दिल्यात.
ह्या बस स्टॅण्डाचे कस्टोडियन अधिकारी हे येरादारी खात्याचे सहाय्यक संचालक आसात. ताका लागून बस स्टॅण्डा वेलो अवैद्य प्रकार थांबोवपाची जबाबदारी तांची आसा अशें रोलंड मार्टीन हांणी सांगलें.
म्हापशें कदंब बस स्टॅण्डार कांय लोकांचे शुल्लक वेवसायीक हितसंबंद पुराय करपा खातीर अतिक्रमण करतात. तशेंच येरादारी खातें आनी जिल्होधिकाऱ्यांचे सुचोवणेक बगल दिवपाचो हो एकंदरीत प्रकार निरशेणी हाडपी आसा. ह्या बस स्टॅण्डार कसलोच अनुचीत अपघात जावचे पयलीं भौशीक सुरक्षीततायेचे नदरेन हो च्यायेचो स्टॉल बंद करचो. तशेंच हें अवैद्य दुकान मोडून बस स्टॅण्डाच्या फ्लॅटफॉर्माची सुवात पुर्वरत करची.
– रोलंड मार्टीन, समन्वयक गोवा कॅन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
