म्हापशें पालिकेचे बसकेंत करवाडीक विरोध

भांगरभूंय | प्रतिनिधी

सत्ताधारी नगरसेवकां मदीं समन्वयाचो उणावः नगराध्यक्ष पडली एकसुरी

भांगरभूंय । प्रतिनिधी

म्हापशें पालिका मंडळाचे बसकेंत करवाडीक सत्ताधारी गटांतल्या नगरसेवकांनी विरोध केलो. सत्ताधारी नगरसेवकांचो अपेक्षीत तेंको मेळूंक नाशिल्ल्यान करवाडीचो बेत फसलो. सत्ताधारी गटांतल्या नगरसेवकां मदींच करवाडी बाबतींत समन्वय नाशिल्ल्यान चडशे सगळेच मुद्दे फुडें धुकल्ले. हे बसकेंत नगराध्यक्ष एकसुरी पडली.

लोमारा नगराध्यक्ष प्रिया मिशाळ हांचे अध्यक्षे खाला पालिका मंडळाची विशेश बसका जाली. उपनगराध्यक्ष विराज फडके, मुख्याधिकारी अमितेश शिरवयकार आनी प्रकाश भिवशेट आनी डॉ. नूतन बिचोलकार सोडून बाकीचे नगरसेवक, नगरसेविका ह्या वेळार हाजीर आशिल्ल्यो.

बसकेंत टावन मार्केट वेंडींग समितीची थापणूक केली. जाल्यार सोपो आनी पे- पार्कीग निविदांचो प्रस्ताव फुडें धुकल्लो. ह्या दोनूय प्रस्तावांचो आराखडो बसके मुखार दवरूंक नाशिल्लो. तशेंच म्हादय संबंदांत केंद्र सरकारान कर्नाटकाक दिल्लो डीपीआर रद्द करप, न्हंयेचें उदक घुंवडावपाक विरोध करपी थाराव एकमतान मंजूर केलो. नगरसेवक अ‍ॅड. शशांक नार्वेकार हांणी हो प्रस्ताव मांडलो. ताका नगरसेवक साईनाथ राऊळ हांणी अनुमोदन दिलें.

करवाडीक सत्ताधारी गटांतले नगरसेवक आशिर्वाद खोर्जुवेंकार हांणी ठाम विरोध केलो. पालिकेन महसूल वाडी खातीर थकीत महसूल एकठांय करपाचेर चड भर दिवचो. आराम सोडा इमारत, बाजारपेठेंतले हेर पुराय जाल्ल्या दुकानांची पावणी करून महसूल मेळोवचो. शारांत रातचे उसरां मेरेन खूबशे बेकोयदो गाडे आनी वेवसाय चलतात. ताका लागून पालिका मार्केटा सयत शारांतल्या खूबशा हॉटेलांक आनी रॅस्टोरंण्टांक मार बसला. अशें आसून लेगीत हे वेवसायीक चुकानासतना कर भरतात. ताका लागून पालिकेन ह्या वेपाऱ्यांचेर करवाडीचें अतिरिक्त वजें घालचें न्हय, अशी मागणी तांणी केली.

नगरसेवक शशांक नार्वेकार हांणी सांगलें, दोन वर्सां आदीं पालिकेन कोयर कर 750 रुपया दर कुटुंबा खातीर लागू केलो. पूण शारांतलें कोयर वेवस्थापन सुदरूंक ना. ताका लागून पालिकेन कोयर करांत नवी करवाड करची, न्हय अशी तांणी मागणी केली.

पालिका बसकेंत मंजूर केल्ल्या नव्या दरा प्रमाण, डुप्लिकेट वेपार परवानो कर 200 रुपया, वेपार परवानो दुरुस्ती खातीर 700 रुपया, वेवसायीक कर 5 हजार रुपया, गाडयां वयल्या जायरातीं खातीर दर चौखण फूट प्रमाण दिसाक 50 रुपया, हॉटेलांतल्या प्रदर्शना खातीर दिसाक 2 हजार रुपया, हंगामी माटवांतल्या प्रदर्शना खातीर दर चौखण मिटराक दिसाक 25 हजार रुपया, घर खरेदी (सेलडीडी) शुल्क एका हजारा बदला 2 हजार रुपया, करारपत्र हस्तांतरण एका हजारा बदला 2 हजार रुपया, वेवसायीक (सेलडीड) 2 हजारा बदला 5 हजार रुपया, करारपत्रा प्रमाण 2 हजारां बदला नवो दर 5 हजार रुपया, बाजारांत फेरी विक्रेत्यांचो म्हाल जप्त केलो जाल्यार 500 ते 5 हजार रुपया मेरेन दंड, तशेंच पालिका वाठारांत तंबाकूच्या पदार्थांची विक्री केली जाल्यार चडांत चड 25 हजार रुपया दंड आनी त्या दुकानाक कुलूप. पालिकेच्या लेखा तशेंच अभियंता विभागा कडल्यान आयिल्ल्या करवाडीच्या मुद्द्या वयल्यान मुख्याधिकाऱ्यान करवाडीचो विशय बसकेचे पत्रिकेंत आस्पावीत केल्लो. ह्या विशयाचेर कांय मेजकेच नगरसेवक सोडले जाल्यार नगराध्यक्ष आनी हेर नगरसेवकाचीं मतां आयकून घेवंक नात. ताका लागून करवाडीचे चडशे विशय फुडें धुकलपाचो वेळ सत्ताधारी गटाचेर आयलो.

घरपटी दर

घरपटी कराप्रमाण नळयांचे घर जैसे थे, आरसीसी बांदकाम 4 रुपया 40 पयशां बदला 10 रुपया दर चौखण मिटरा खातीर, वेवसायीक आरसीसी बांदकाम 30 रुपया दर चौखणा खातीर, वेवसायीक मंगलोर नळ्यांचें घर 15 रुपया दर चौखण मिटर, बेकायदो बांदकाम आरसीसी 40 रुपया दर चौखण मिटर, अशी घरपटी घेवपाचें थारलें.

तात्पुरतो नाहरकत दाखलो दरवाड शेळेली

तात्पुरतो नाहरकत दाखलो (एनओसी) दर 500 रुपया वयल्यान एक हजार रुपया करपाचेर मतदान जालें. पूण सत्ताधारी गटांतल्या फक्त तिगांनीच ताका तेंको दिलो. जाल्यार विरोधी तशेंच कांय सत्ताधारी नगरसेवकांनी हे प्रक्रियेंत वांटो घेनासतना तटस्थ रावले. ताका लागून हो प्रस्ताव शेळेलो. हे खातीर सत्ताधारी गट नाकयां पडलो.