भांगरभूंय | प्रतिनिधी
लोकांक परतुचें पडलें घरा; दनपारां दुरुस्त केलो पूण विभागाचो वेळ सोंपिल्लो
म्हापशें: हांगासरले पालिका कचेरेंत जल्म, मरण नोंदणी विभागाचो संगणक प्रिंटर इबाडलो आनी जल्म, मरण प्रमाणपत्र वितरीत करपाक अडचण निर्माण जाली. हाका लागून हें प्रमाणपत्र मेळोवपा खातीर पालिकेंत आयिल्ल्या लोकांक परतून घरा वच्चें पडलें. दनपारां हो प्रिंटर पालिकेन दुरुस्त केलो.
सोमारा सकाळीं म्हापशें पालिकेच्या जल्म, मरण नोंदणी विभागाचो संगणक प्रिंटर नादुरुस्त जाल्लो. ताका लागून लोकांक हें प्रमाणपत्र वितरीत करप कर्मचाऱ्यांक शक्य जालें ना. पालिकेंतल्या संगणकीय सामानाची देखरेख करपी कर्मचारी रजेर आशिल्लो. ताका लागून हेर कर्मचाऱ्यांनी हो प्रिंटर पळोवपाक न्हयकार दिलो. हाका लागून जल्म, मरण नोंदणी कावंटरा मुखार लोकांची व्हड रांग लागली. प्रिंटर चलत नाशिल्ल्याचें सांगून हें प्रमाणपत्र मेळोवपा खातीर आयिल्ल्या लोकांक परतून वच्चें पडलें.
जेन्ना ‘भांगरभूंय’न हे विशींची अपडेट दिले उपरांत पालिका अधिकारी आनी कर्मचारी जागे जाले आनी तांणी तज्ञाक आपोवन हो प्रिंटर दुरुस्त केलो. तो मेरेन दनपार जाल्ली आनी ह्या विभागाची उक्ती रावपाची वेळ सोंपिल्ली. ताका लागून हो प्रिंटर दुरुस्त करून लेगीत प्रमाणपत्र मेळोवपा खातीर आयिल्ल्या लोकांक ताचो उपेग जालो ना.
म्हापशें पालिकेच्या जल्म आनी मरण नोंदणी विभागाचें वेळापत्रक एका बायल कर्मचाऱ्यान भायले भायर आपले मर्जी प्रमाण फाटल्या एप्रील 2022 वर्सा बदलिल्लें. सकाळीं 9.30 ते दनपारां 1 आनी दनपारां 2 ते सांजवेळा 4 अशें ह्या विभागाचें वेळापत्रक आशिल्लें. पूण तातूंत सकाळीं 9.45 ते 1 आनी दनपारां 2 ते सांजवेळा 3.50 असो बदल केलो. हे खातीर पालिका मंडळाची मान्यताय गरजेची आशिल्ली. पूण विद्यमान पालिका मंडळांतल्या हेर बेकायदो प्रकारा प्रमाणूच ह्या वेळापत्रकांतूय बेकायदो रितीन फेरफार केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
