भांगरभूंय | प्रतिनिधी
भांगरभूंय । प्रतिनिधी
म्हापशेंः परत परत निविदा जारी करून लेगीत म्हापशें पालिका मंडळाक म्हापशे पालिका मार्केटांतलो सोपो कर एकठांय करपाक कंत्राटदार मेळना अशी स्थिती उप्राशिल्ल्यान महसूल येणावळी खातीर पर्यायी येवजण तयार करपाचें मंडळान थारायलां. येणावळ वाडोवपा खातीर रस्त्यार बसून माल विकतात त्यांचे कडल्यान जीएसटी एकठांय करपाचे मंडळान विचार चलयला अशी खबर आसा.
सोपो कर निवदेक कंत्राटदारां कडल्यान प्रतिसाद मेळना तें पळोवन सोपो बोलीची रक्कम उणे करपाचेंय मंडळान थारायलां अशें सांगतात. 2023-24 वर्सा खातीर सुरवेक सोपो कराची बोली 2 कोटी 60 लाख रुपयांची आशिल्ली. मात कंत्राटदार ती घेवपाक येनात तें पळोवन ही रक्कम 1 कोटी 67 लाख केली. तरीय कंत्राटदार ती घेवपाक तयार नाशिल्ल्यान आपल्या कर्मचाऱ्यां वरवी वेपाऱ्यां कडल्यान सोपो एकठांय करपाची पाळी पालिका मंडळाचेर आयल्या.
सोपो कंत्राटदार एकठांय करून दिताले ताचे परस उणी रक्कम कर्मचाऱ्यां कडल्यान सोपो एकठांय करपाचे काम करून घेतल्यार मेळटा. ताका लागून महसुली येणावळीचेर परिणाम जाता. सोपो एकठांय करपा खातीर कर्मचाऱ्यांक पाळी पद्दतीचेर कामाक लावपाचो आनी कर्मचाऱ्यांक हे बदली कामा खातीर धाडपाचीय समस्या आसता.
सोपो कर रक्कमेंतल्यान जीएसटी कुशीक काडल्ल्यान सोपो कर एकठांय करपाचें काम करपाक कंत्राटदार फुडें येनात अशी म्हायती पालिका मंडळाच्या एका ज्येश्ठ कर अधिकाऱ्यान सांगलें. विक्रेत्यां कडल्यान जीएसटी एकठांय करपाचें काम दिल्यार कंत्राटदार फुडे येवपाक शकतात. फोडें आनी दिवचल पालिका मंडळ कंत्राटदारां कडल्यान जीएसटी एकठांय करता. ती पद्दत म्हापश्यांत सुरू करपाचेर पालिका मंडळान सध्या विचार चलयला. व्हो प्रस्ताव पालिका मंडळाचे बसकेंत मांडून पास केल्या उपरांत ताची कार्यवाही जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
