भांगरभूंय | प्रतिनिधी
सुमार 1665 चौखण मिटर सुवातेंत उबारतात हो प्रकल्प
म्हापशें: पालिका गॅरेज हो वेवसायीक संकूल प्रकल्प फाटल्या तीन वर्सां सावन सुरू आसा. गोंय राज्य नागरी विकास एजन्सी वतीन ह्या प्रकल्पाचें बांदकाम सुरू आसा. येता त्या मार्च 2023 मेरेन हो प्रकल्प पुराय जावपाची शक्यताय आसा.
आंगड हांगा म्हापशें नगरपालिका गॅरेजीच्या पुनर्विकास प्रकल्पाचें सद्या काम सुरू आसा. हो महसूल निर्माण करपी प्रकल्प आसून पालिकेक हातूंतल्यान व्हड महसुलाची अपेक्षा आसा.
2019 वर्सा तेन्नाचे नगर विकास मंत्री मिलिंद नायक हांचे हस्तुकीं ह्या प्रकल्पाचो शुभारंभ केल्लो. हाचेर 20.5 कोटी रुपया खर्च केल्ले. सुमार 1665 चौखण मिटर सुवातेंत हो प्रकल्प उबारतात. ह्या प्रकल्पाचो प्रस्ताव 2015 वर्सा दवरिल्लो.
तळमाळ्या सयत स माळ्याचो हो प्रकल्प आसा. बेसमंट माळ्यार पार्किंगेची सुविधा आसतली. तळमाळ्यार सात आनी पयल्या माळ्यार 14 दुकानां आसतलीं. जाल्यार दुसरो, तिसरो, चवथो, पांचवो आनी सवो ह्या माळ्यांचेर कचेऱ्यो आसतल्यो.
हो प्रकल्प 17 ते 18 म्हयन्यांत पुराय जावंक जाय आशिल्लो. पूण कोरोना म्हामारी सयत हेर विवीध आडमेळ्यांक ह्या प्रकल्पाक तोंड दिवचें पडलें. ताका लागून बांदकामाचे गतीचेर परिणाम जालो. आतां प्रकल्पाचें बांदकाम पुराय तांकीन सुरू आसून, मार्च 2023 मेरेन हो प्रकल्प पुराय करून म्हापशें पालिकेचे सुवादीन करपाचो निश्चेव कंत्राटदार कंपनीन केला.
कोरोनाक लागून ह्या प्रकल्पाच्या बांदकामाचेर परिणाम जाल्लो. पूण आतां आमी 60 टक्के काम पुराय केल्लें आसून मार्च 2023 मेरेन हो प्रकल्प पालिके कडेन सुपूर्द करतले अशी म्हायती जीसुडाच्या एका वरिश्ठ अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
