भांगरभूंय | प्रतिनिधी
म्हापशें: म्हापशें पालिकेन पावसा पयलीं शारांतल्या गटारांची नितळसाण करपाचें काम सुरू केलां. एप्रीलाच्या मदेका मेरेन पालिकेच्या 20 सूय प्रभागांतल्या गटारांतलो गाळ काडपाच्या पयल्या टप्प्याचें काम पुराय जावप अपेक्षीत आसा.
पावसाचे फाटभुंयेर म्हापशें पालिकेन गटारां आनी नालें नितळ करपाचें काम हातांत घेतलां. हे खातीर प्रभागांची दोन गटांत विभागणी केल्या. गट एकांत प्रभाग 1 ते 10 आनी गट दोनांत प्रभाग 11 ते 20 हांचो आस्पाव आसा. हे खातीर एक पर्यवेक्षक आनी 10 कामगार अशे 11 कर्मचारी आशिल्ले दोन गट तयार केल्यात.
तशेंच पालिका बाजारपेठेंतल्या सगल्या गटारांची नितळसाण करपा खातीर पालिकेन निविदा काडल्या. तशेंच पालिकेन आमदारांचे मजतीन उदका स्रोत खात्याक पत्र धाडले उपरांत शारांतल्या विवीध वाठारांनी आशिल्ल्या 18 मुखेल नाल्यांतलो गाळ काडपाचें काम खात्यान हातांत घेतलां.
नगराध्यक्ष डॉ. नूतन बिचोलकार हांणी म्हणलें, मॉन्सूनपूर्व कामांचो एक भाग म्हूण प्रभागांतल्या गटारांतलो गाळ काडपाचें काम सुरू केलां. दोन गटांत काम जायत आसून ते खातीर दरेकी 10 कामगारांचो वापर करतात. तशेंच पालिकेन बाजारांतल्या गटारांचे नितळसाणे खातीर 42 लाखांची निविदा काडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
