भांगरभूंय | प्रतिनिधी
मड्यांकुडीची सुविधा खंडीत; लोकांची गैरसोय
म्हापशें: जिल्हो हॉस्पिटलांतल्या मड्यांकुडींतल्या दोन कॅबिनाक गळटी लागिल्ल्यान ती नादुरुस्त आसात. जाल्यार एका कॅबिनांत अनवळखी कुडी पडून आसात. मड्यांकुडीची सुविधा नाशिल्ल्यान म्हापशें शार आनी वाठारांतल्या सर्वसामान्य लोकांची गैरसोय जायत आसा.
मेळिल्ले म्हायती प्रमाण पेडें म्हापश्यां उत्तर गोंय जिल्हो हॉस्पिटलांत सरकारान मड्यांकुडीची वेवस्था केल्या. ह्या मड्यांकुडींनी एकाच वेळार 12 कुडी दवरपाची वेवस्था आसा. ते खातीर मॉर्गांत तीन कॅबीन आसून दरेकी चार प्रमाण कुडी दवरतात.
पूण फाटल्या म्हयन्या सावन तिनांतले दोन मॉर्ग कॅबिनाक गळटी लागल्या. गळटी लागून हीं दोनूय कॅबिनां नादुरुस्त जाल्ल्यान तातूंत कुडी दवरप शक्य जायना. जाल्यार एक कॅबीन कार्यरत आसून तातूंत तीन वर्सां सावन चार अनवळखी कुडी पडून आसात. हे 2022 ते 2024 ह्या काळांतल्यो कुडी दवरल्यात. पूण तांचो पुलीस वा जिल्हो हॉस्पिटलान विलो लायिल्लो ना.
गळटी लागिल्ल्या ह्या मड्यांकुडीच्या कॅबिना विशीं जिल्हो हॉस्पिटला कडल्यान म्हायती मेळ्ळे उपरांत संबंदीत कंपनीन सदर कॅबीन दुरुस्त करपाचो यत्न केलो. पूण सेगीत दुरुस्त करून लेगीत परतून गळटी लागत आशिल्ल्यान हीं दोनूय कॅबिनां दुरुस्त जावप शक्य नाशिल्ल्याचें कंपनीन हॉस्पिटलाच्या अधिकाऱ्यांक म्हायती दिली. उपरांत नव्या कॅबिनाचो प्रस्ताव हॉस्पिटला कडल्यान सरकाराक सादर केला.
रहिवाशी संतोष मोरजकार हांणी सांगलें, म्हापशें जिल्हो हॉस्पिटलांत मड्यांकूड आशिल्ल्यान लोकांची सोय जाताली. पूण सद्या ह्या मड्यांकुडीक गळटी लागल्या. जाल्यार चार कुडी फाटलीं 3 ते 4 वर्सां पडून आसात. तातूंतली एक कूड कोवीड काळांतली आसा. ताका लागून गरजू लोकांक ही सेवा मेळप कठीण जालां. भलायकी मंत्री विश्वजीत राणे आनी उपसभापती ज्योशुआ डिसोझा हांणी हातूंत लक्ष घालून ही मुळावी सुविधा तत्काळ पुर्वरत करची अशी मागणी तांणी केली.
नगरसेवक साईनाथ राऊळ हांणी म्हणलें, ही मड्यांकुडीची सुविधा खंडीत जाल्ल्यान एखाद्या मयताच्या कुटुंबा मुखार कूड खंय दवरप हे खातीर धांवपळ करची पडटा. गोमॅकाँत कूड व्हरपाची आसल्यार थंय प्रक्रिये खातीर चार वरांचो वेळ लागता आनी परतून कूड हाडपा खातिरूय तितलोच वेळ लागता. ताका लागून बार्देस आनी वाठारांतल्या लोकांक जिल्हो हॉस्पिटल सगले वटेन सोयीचें थारता. मुख्यमंत्री, भलायकी मंत्री आनी उपसभापती हांणी हातूंत लक्ष घालून समस्या पयस करची अशी मागणी तांणी केली.
जिल्हो हॉस्पिटलांत मड्यांकुडींतल्या दोन कॅबिनांक गळटी लागून तीं नादुरुस्त आसात. जाल्यार एका कॅबिनांत चार कुडी दवरल्यात. ही नादुरुस्त कॅबिनाची सुवात नव्या कॅबिनांत उपलब्ध करची, हे खातीर हॉस्पिटल प्रशासना कडल्यान भौशीक बांदकाम खात्याक अदमासपत्रका सयत प्रस्ताव धाडला अशी म्हायती हॉस्पिटलाच्या अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
