भांगरभूंय | प्रतिनिधी
आमदार जोशुआ डिसोझा हस्तुकीं कामाचो शुभारंभ
म्हापशें ः म्हापशें शारांत जमनी पोंदच्या लायटीच्यो सरयो घालपाच्या कामाक सुरवात जाल्या. म्हापशेंचे आमदार जोशुआ डिसोझा हांचे हाजेरींत नाल्ल फोडून ह्या कामाचो शुभारंभ जालो. 11 आनी 9 केव्ही लायटीच्यो सरयो जमनी पोंदच्यान घालतले. सुमार 116.80 कोटी रुपया ह्या प्रकल्पाक खर्च येतलो. देड वर्सान हें काम पुराय जातलें. म्हापशें मार्केट, आंंगड, मरड, दत्तवाडी, कोर्ट जंक्शन, अलंकार थिएटर, खोर्ली, बोडगेश्वर देवूळ, बस स्टॅण्ड आनी अन्साभाट ह्या वाठारांत लायटीच्यो सरयो घालपाच्या कामाक सुरवात करतले. हें काम चाळीस दिसांनी पुराय जातलें.
ह्या वेळार नगराध्यक्ष शुभांगी वायंगणकार, नगरसेवक स्वप्नील शिरोडकार, विराज फडके, आशीर्वाद खोर्जुवेंकार, प्रिया मिशाळ, कार्यकारी अभियंते प्रदीप नार्वेकार, सहाय्यक अभियंते नॉर्मन आताईद आनी हेर पदाधिकारी आनी कंत्राटदार कंपनीचे अधिकारी हाजीर आशिल्ले.
कार्यकारी वीज अभियंते प्रदीप नार्वेंकार हांणी, ह्या प्रकल्पा खाला शारांत 77 नवे वीज ट्रान्सफॉर्मर उबारतले. मान्सुनाक लागून ह्या कामा खातीर जिल्हो अधिकार्या कडल्यान विशेश परवानगी घेतल्या. क्षितीज दिशात्मक ड्रिलींग (एचडीडी) प्रणालीच्या माध्यमांतल्यान येवपी तीन म्हयन्यांनी 40 किलो मिटर सरयांचें काम पुराय करतले.
ह्या कामा खातीर नगरसेवक आनी थळाव्यांचें सहकार्य अपेक्षीत आशिल्ल्यान 2023 च्या निमाणें मेरेन हें काम पुराय करतले. लोकांचें सहकार्य मेळ्ळ्यार हें काम नियोजीत वेळा पयलीं पुराय जातलें, अशें नार्वेंकार हांणी म्हणलें.
तांत्रिकी मंजुरीच्या कारणाक लागून हें काम लांबायेर पडिल्लें. आतां देड वर्सान हें काम पुराय जातलें. सुरवातेक 11 केव्ही लायटीच्यो सरयो घालतले. ह्या प्रकल्पाा लागून म्हापशें शाराक फुडाराक सुरळीत लायटीची पुरवण जातली. तेन्नाचे वीज मंत्री नीलेश काब्राल आनी आतांचे वीज मंत्री सुदिन ढवळीकार हांचें ह्या कामा खातीर सहकार्य मेळिल्ल्यान तांचो आपूण उपकारी आशिल्ल्याचें आमदार जोशुआ डिसोझा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
