भांगरभूंय | प्रतिनिधी
म्हापशें: गणेशपुरी, म्हापश्यां वैयक्तीक वादांतल्यान जाल्ल्या अहमद देवडी (30, लक्ष्मीनगर, म्हापशें) ह्या तरणाट्याच्या खून प्रकरणांतलो मुखेल दुबावीत आरोपी रामकृष्ण उत्तम भोलकर उर्फ आरके (32, रा. लक्ष्मीनगर म्हापशें आनी मूळ कोल्हापूर) हाका आंबोली (महाराष्ट्र) सावन पुलिसांनी अटक केली. दुबावीत आरोपी फाटल्या 22 दिसां सावन फरार आशिल्लो.
फाटल्या 30 मे दिसा फांतोडेर 3 वरांच्या सुमाराक गणेशपुरी म्हापश्यां वैयक्तीक वादांतल्यान लोखंडाचे सळयेन जिवघेणो हल्ल्याची घडणूक घडिल्ली. ह्या हल्ल्यांत अहमद देवडी आनी संदेश साळकार हे गंभीर जखमी जाल्ले. जखमी साळकार हाका कांय दिसांनी उपचारा उपरांत घरा धाडून दिल्लो. जाल्यार खर जखमी अवस्थेंतलो अहमद देवडी हाका मंगळारा 18 जून दिसा उपचारा वेळार गोमॅकाँत मरण आयिल्लें.
फरारी मुखेल दुबाविताक अटक जाय मेरेन कूड ताब्यांत घेवपाक मयताच्या कुटुंबान न्हयकार दिल्लो. पूण पुलिसांच्या आस्वासना उपरांत बिरेस्तार 20 वेर मयत देवडीची कूड ताब्यांत घेवन दफन प्रक्रिया पार पाडिल्ली.
ह्या हल्ल्यांत दुबावीत रामकृष्ण भालेकर उर्फ आरके हो घडणुकेच्या दिसा सावन फरारी आशिल्लो. ह्या प्रकरणांत म्हापशें पुलिसांनी दुबावीत आरोपी मंथन राजू च्यारी (24, रा. घाटेश्वरनगर खोर्ली), श्रीधर शिवाजी किल्लेदार (26, रा. समतानगर खोर्ली) आनी अभिषेक रमेश पुजारी (20, रा. गंगानगर खोर्ली) हांकां 6 जून दिसा शरणबासू उर्फ चम्पी बुधाप्पा गायकवाड (27, रा. लक्ष्मीनगर म्हापशें आनी मूळ अक्कलकोट), नागराज उर्फ नागे दशरथ पुजारी (19, रा. पेडें म्हापशें आनी मूळ बेळगांवी) आनी बोरेश सतीश पुजारी (38, शेल्डें-केपें आनी मूळ गोकाक) ह्या स जाणांक अटक केल्ली. आतां आरके हाका अटक केल्ल्यान ही संख्या सात जाली.
पुलिसांनी हाचे पयलीं ह्या प्रकरणांत भा.दं.स.च्या 120(बी), 307, 326, 506 (2) आनी 34 कलमा खाला खुनी हल्ल्याचो गुन्यांव नोंद केल्लो. आतां पुलिसांनी भादंसंच्या 302 कलमा खाला खुनाचो गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
