भांगरभूंय | प्रतिनिधी
अरुंद कॉरिडॉर आनी अपुर्ण सुवातेक लागून सोसचे पडले त्रास
म्हापशें : म्हापशेंचे उपजिल्लोधिकारी-२ कार्यालयांत बिरेस्तारा वकील आनी पक्षकारांची व्हडा प्रमाणांत गर्दी जाल्ल्यान ह्या वाठारांत बोवाळ निर्माण जाला. अरुंद कॉरिडॉर आनी अपुर्ण सुवातेक लागून नागरिकांक तशेंच वकिलांक व्हड गैरसोयीक तोंड दिवचें पडलें.
बार्देस उपजिल्लोधिकारी वसंत दाभोलकार हांच्या कार्यालयांत विवीध कामां खातीर आशिल्ल्या नागरिकांचो आंकडो वाडिल्ल्यान पुराय वाठारांत गर्दी जाली. खुबश्या पक्षकारांक आपापल्या कामां खातीर बरोच काळ वाट पळोवची पडली. कांय वकिलांकूय वरांचीं वरां उबे रावन आपल्या प्रकरणांच्या सुनावणेची वाट पळोवची पडली अशें सांगलें.
कांय वकिलांनीहे परिस्थिती विशीं चिंता उक्तावन कार्यालयांतल्या अपुर्ण मुळाव्यो सुविधा आनी प्रभावी गर्दी, वेवस्थापनाचो उणाव हाचे कडेन लक्ष गेलें. अशे परिस्थितीक लागून न्यायप्रक्रिया आनी प्रशासकीय कामाचे गतीचेर परिणाम जाता अशें तांणी सांगलें. पयसुल्ल्यान आयिल्ल्या पक्षकारांकूय गर्देक लागून कार्यालयांत वावुरतना आडखळी निर्माण जाल्यो. वाट पळोवपा जाय तशी वेवस्था नाशिल्ल्यान खुबश्या जाणांक गैर वेवस्थेक तोंड दिवचें पडलें.
हेच फाटभूंयेर कार्यालयांतले सुवातेचें योग्य नियोजन, अदीक सुविधा, स्वतंत्र वाट पळोवपाची कूड आनी प्रभावी गर्दी नियंत्रण उपाय येवजण राबोवपाची मागणी केली. न्यायवेवस्थे कडेन संबंदीत कामकाज सुरळीत आनी वेगवान जावपा खातीर संबंदीत प्रशासनान बेगोबेग हाचेर लक्ष घालपाची गरज आशिल्ल्याची भावना वकील आनी नागरिकांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
