भांगरभूंय | प्रतिनिधी
पणजी : म्हापशेंच्या स्थानबद्धता (डिटेंशन) केंद्रांतल्यान रशियन नागरीक पळून गेल्ल्याची धक्को दिवपी घडणूक मुखार आयल्या. उपरांत पुलीस आनी सुरक्षा यंत्रणां सतर्क जाल्ल्यान; तांचो सोद घेवपा खातीर व्यापक मोहीम हातांत घेतल्या.
हे विशीं मेळिल्ले म्हायती प्रमाण, विदेशी नागरिकां खातीरच्या म्हापशें डिटेंशन सेंटरांत ह्या रशियन नागरिकाक दवरिल्लो. मात, सुरक्षा वेवस्थेंतले त्रुटीचो फायदो घेवन तांणी केंद्रांतल्यान पळ काडिल्ल्याचें मुळाव्या तपासांतल्यान मुखार आयलां.
हे घडणुकेची म्हायती मेळटांच थळावे पुलीस, गुन्यांव फांटो तशेंच हेर सुरक्षा यंत्रणांनी ह्या वाठारांत सोद मोहीम सुरू केल्या. राज्यांतल्या विवीध तपासणी नाक्यांचेर सतर्कतेचें आदेश दिल्यात.
रेल्वे स्टेशनां, बस स्टॅण्ड आनी विमानतळांचेर विशेश नदर दवरल्या. ह्या प्रकरणांत संबंदीत सुरक्षा कर्मचार्यां कडल्यान म्हायती घेतात. फरारी नागरीक नेमको कसो पळून गेलो, हाचो तपास चालू आसा. पुलिसांनी नागरिकांक कितेंय म्हायती मेळ्ळ्यार वा दुबावीत हालचाली जाणवल्यार बेगोबेग महायती दिवपाचो उलो मारला.
मजगतीं, हे घडणुकेक लागून डिटेंशन सेंटरांतले सुरक्षा वेवस्थेचेर प्रस्न उप्रासल्यात. प्रशासनान सुरक्षा उपाययेवजण्यांचे पुनरावलोकन सुरू केलां. फरारी रशियन नागरिकांचो सोद घेवपा खातीर पुलिसांचो विशेश पंगड कार्यरत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
