भांगरभूंय | प्रतिनिधी
संजय बर्डे हांची मुख्य सचिवां कडेन कारवायेची मागणी
म्हापशें: नगरपालिकेचे मान्यताये बगर पे पार्कींग शुल्क, सोपो कर आनी सेनिटेशन फी हे कर लागू करपा सयत पालिका मुख्याधिकारी चंद्रकांत शेटकार हांणी हुकुमशायेचो कारभार चलयला. ताका लागून तांचे आड योग्य ती कारवाय करची अशी मागणी रहिवाशी संजय बर्डे हांणी राज्याच्या मुख्य सचिवां कडेन केल्या.
ह्या निवेदनाच्यो प्रती शार उदरगत मंत्री, नगरपालिका संचालनालय आनी म्हापशें नगराध्यक्ष हांकां बर्डे हांणी सादर केल्यात.
मुख्याधिकारी शेटकार हे आपल्या अधिकाराचो गैरवापर करून पालिका मंडळाच्या थारावा बगर म्हापशेंच्या लोकांचेर वाडीव कर लादला असो आरोप बर्डे हांणी ह्या निवेदनांत केला.
तशेंच मुख्याधिकारी शेटकार हे लोकां कडेन बरे वागनात. कचेरेंत वेळार येनात. लोकांक ताटकळत दवरून लोकांचो वेळ फुकट घालयतात अशेंय ह्या निवेदनांत म्हणलां.
हालींच पे पार्कींग शुल्क, सोपो शुल्क आनी सेनिटेशन फी तशेंच कोयर करांत सुमारा भायर वाड केल्ली. ही कर वाड करतना पालिका मंडळाक विस्वासांत वा तसो थाराव घेवंक नाशिल्लो. पार्किंगेचें शुल्क 20 रुपया वेल्यान 60 रुपया केलें. तशेंच 2020 वर्सा सरकारान जारी केल्ले अधिसुचोवणेचो आदार घेवन सेनिटेशन फी शुल्काच्या अंमलबजावणीचो आनीक एक बेकायदो रितीन निर्णय घेतला. पालिका मंडळाक विस्वासांत घेनासतना वेवसायीक आस्थापनांचेर कर घालो.
ह्या एकंदरीत प्रकारा वेल्यान मुख्याधिकारी चंद्रकांत शेटकार हे हुकुमशाय पद्दतीन पालिकेचो प्रशासकी कारभार हाताळीत आसात. तशेंच शारांत बेकायदो बांदकामांक आनी हे अवैद्य कामांक प्रोत्साहन दितात. ताका लागून तांचेर खर कारवाय करची अशी मागणी बर्डे हांणी मुख्य सचिवां सयत हेर संबंदितां कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
