भांगरभूंय | प्रतिनिधी
म्हापशें, प्रतिनिधी ः म्हापशेंच्या श्री देव बोडगेश्र्वर देवळांत दोन म्हयन्यां उपरांत परतून एकदां चोरी जाली. चोरांनी दोन फंड पेटयो फोडून सुमार 12 लाख रुपया चोरले. मास्क घाल्ल्या चार चोरांनी सुरक्षा रक्षकाक कदेलाक बांदून जिवें मारपाची धमकी दिवन फंड पेटी फोडली. देवस्थान समितीन म्हापशें पुलिसांक हे विशीं म्हायती दिले उपरांत पुलिसांनी पंचनामो करुन तपासाक सुरवात केल्या.
बोडगेश्र्वर देवूळ गोंयां वांगडाच कर्नाटकांत, महाराष्ट्रांतय फामाद आसा. नवसाक पावपी देव आनी राखणदार म्हणून ताची नामना पातळत आसा. पूण ह्याच देवळाक आतां चोरांनी लक्ष्य केलां.
दोन म्हयन्यां आदीं 28 मार्चाक फांतोडेर 4.30 वरांचेर ह्या देवळांत देवाच्या पादुकांची पेटी चोरांनी फोडिल्ल्यान खूब बोवाळ जाल्लो. त्या प्रकरणांत म्हापशें पुलिसांनी रोखडेच कर्नाटकांतले सागर शिंदे (40) आनी आनंद नायक (40) हांकां अटक केल्ली. पूण आयज ह्याच देवळांत परतून एकदा चोरांनी दोन फंड पेटी फोडून 12 लाख चोरले.
हो चोरयेचो प्रकार देवळाचे सीसीटीव्ही फुटेजींत बंदिस्त जालां. सीसीटीव्ही फुटेजा प्रमाण मास्क घाल्ले चार चोर मध्यान रातीं सुमार 2.07 वरांचेर देवळांत भितर सरले. उपरांत ह्या चारय जाणांनी सुरक्षा रक्षकाक धमकायलो आनी ताका देवळाच्या फाटल्यान व्हरून कदेलाक बांदलो. ते उपरांत देवळांतल्यो दोनूय फंड पेटी फोडल्यो. सकाळीं एक मनीस देवळांत दर्शना खातीर आयलो तेन्ना हो सगळो प्रकार नदरेक आयलो. ताणें सुरक्षा रक्षकाक सोडयलो. ते उपरांत दोगांयनी देवळा लागसारच्या पुजाऱ्याच्या घरा वचून घडणूके विशीं म्हायती दिली. ताणें देवूळ समिती कडेन संपर्क केलो. उपरांत देवूळ समितीन रोखडीच म्हापशें पुलिसांक म्हायती दिली. देवस्थानाच्या म्हणण्या प्रमाण फंड पेटींत सुमार 12 लाख रुपया आशिल्ले.
पुलिसांनी पंचनामो करुन तपासाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
