भांगरभूंय | प्रतिनिधी
– नगरसेवकाचे कागाळी उपरांत मुख्याधिकाऱ्याची कारवाय
म्हापशें: गांवसवाडो म्हापश्यां सुरू आशिल्लीं दोनूय बेकायदो बांदकामांचेर पालिकेन कारवाय करून काम बंद करपाची नोटीस दिली. थळावे नगरसेवक प्रकाश भिवशेट हांणी हो अवैद्य प्रकार नगराध्यक्षा आनी पालिका मुख्याधिकाऱ्याचे नदरेक हाडून दितकच पालिकेन रोखडीच कारवाय केली.
शुक्रारा 8 वेर सकाळीं गांवसवाड्यार फार्म डेक रॅस्टोरंण्टा कुशीचे शेत जमनींत बेकायदो रितीन पक्के बांदकाम हातांत घेतिल्लें. हो प्रकार नगरसेवक भिवशेट हांचे नदरेक आयलो. तांणी हाची म्हायती नगराध्यक्षा डॉ. नूतन बिचोलकार आनी पालिका मुख्याधिकारी चंद्रकांत शेटकार हांकां दिली. तशेंच ह्या बांदकामाचे फोटेय संबंदितांक धाडून दिले.
हीं बांदकामां पालिकेची परवानगी घेनासतना सुरू आशिल्ल्याचें दिसून आयलें. ते प्रमाण ह्या बांदकामाची दखल घेवन पालिका मुख्याधिकाऱ्यांनी सांजवेळा बांदकाम बंदची नोटीस जारी केली. ह्या नोटिसीची प्रत बेकायदो बांदकाम करपी डिसोझा आनी बडीगर हांकां दिली.
तशेंच शेनवार आनी आयतार ह्या सुटयेच्या दिसा हीं बेकायदो बांदकामां सुरू उरचीं नात हाची दक्षता घेवपा खातीर पालिका मुख्याधिकाऱ्यांनी म्हापशें पुलिसांकूय नोटिसेची प्रत धाडून दिल्या.
गांवसवाड्यार आपल्या प्रभाग 20 त बेकायदो बांदकामां सुरू आशिल्ल्याची म्हायती नगराध्यक्ष आनी पालिका मुख्याधिकाऱ्यांक दिवन आवश्यक ती कारवाय करपाची विनंती हांवें केल्या. अशीं बेकायदो बांदकामां जायत आशिल्ल्यान सरकार तशेंच नगरपालिकेक कायदेशीर महसुलाक मुकचें पडटा. ताका लागून अशा बांदकामांचेर पालिकेन सक्तीची दक्षता दवरची.
प्रकाश भिवशेट, नगरसेवक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
