भांगरभूंय | प्रतिनिधी
म्हापशें, प्रतिनिधी ः म्हापशेंच्या उपनगराध्यक्षाची निवड बुधवार ६ फेब्रुवारीक सकाळीं ११ वरांचेर जातली. ते खातीर नगरविकास संचालक ब्रिजेश मणेरकार हांणी त्या दिसा पालिका मंडळाचे विशेश बसकेचें आयोजन केलां. सत्ताधारी गटान नगरसेवक सुशांत हरमलकार हांची उपनगराध्यक्ष पदा खातीर नेमणूक केल्या.
फाटले २१ फेब्रुवारीक तेन्नाच उपनगराध्यक्ष विराज फडके हांणी सत्ताधारी गटांतल्या अलिखीत कबलाती प्रमाण पदाचो राजिनामो दिल्लो. हो राजिनामो नगरविकास खात्यान ग्राह्य धरिल्लो. ताका लागून फाटल्या २८ फेब्रुवारीक सावन उपनगराध्यक्षपद रितें आशिल्लें.
हें पद भरपा खातीर बुधवारा ६ तारखेक वेंचणूक जातली. ताका लागून पीठासीन अधिकारी म्हणून बार्देशचे उपजिल्होधिकारी उदय प्रभू देसाय हांची नियुक्ती नगरविकास खात्यान केल्या. तशेंच उमेदवारी अर्ज मंगळार ५ वेर दनपार मेरेन पालिका मुख्याधिकारी चंद्रकांत शेटकार हांचे कडेन सादर करपाचो आदेश नगरविकास खात्यान जारी केला.
मजगतीं, सत्ताधारी गटान उपनगराध्यक्षपद नगरसेवक सुशांत हरमलकार हांकां दिवपाचो निर्णय घेतला. हाका भाजपाच्या पादाधिकार्यांनी मान्यताय दिल्ली. ते प्रमाण विराज फडके हांणी पदाचो राजिनामो दिल्लो. सुशांत हरमलकार हे भाजपाच्या म्हापशे मंडळाचे अध्यक्ष. ताका लागून ते ह्या पदार वेंचून येवचे अशी इत्सा पक्ष फुडार्यांनी उक्तायल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
