म्हापशेंचे रस्ते रुंद करप आनी फुटपाथाच्या कामांक आचारसंहिता लागची ना

भांगरभूंय | प्रतिनिधी

गोंयच्या मुंबय उच्च न्यायालयाचो निर्णय

पणजी, बातमीदार : वेंचणूक आचारसंहिता लागली काय उदरगतीच्या कामांचेर निर्बंध येतात. मात, म्हापशेंचे नियोजीत रस्ते रुंद करप आनी फुटपाथ बांदपा विशीं दाखल जनहीत याचिकेचेर सुनावणी करतना गोंयच्या मुंबय उच्च न्यायालयान हीं कामां आचारसंहितेच्या पेंचांतल्यान मुक्त केल्यांत. हीं कामां जनतेच्या हिताचीं आशिल्ल्यान तांकां कसलीच आचारसंहिता लागची ना. संबंदीत यंत्रणांनी कामांची प्रक्रिया सुरू करची, अशे निर्देश न्यायालयान दिल्यात.
म्हापश्यां सध्या पर्रा ते गांधी चौका मेरेनचो रस्तो रुंद करपाचें आनी फुटपाथ बांदपाचें काम सुरू आसा. पर्रा ते श्री बोडगेश्वर देवस्थाना मेरेनचें काम पुराय जालां. उरिल्लें गांधी चौका मेरेनचें काम आतां सुरू करतले. मात, लोकसभा वेंचणुकेची आचारसंहिता लागू जाल्यार तें काम परत म्हयनोभर आडखळून उरपाची शक्यताय आसा. हाचेर आयज उच्च न्यायालयांत सुनावणी जाली. उरिल्ल्या कामां खातीर पीडब्ल्यूडीन वर्क ऑर्डर दिल्या. तशेंच १८० दिसांनी हें काम पुराय करतले, अशें नमूद केलें. ताका लागून हाका आचारसंहिता लागू जावची ना, अशें सांगून उच्च न्यायालयान काम फुडें व्हरपाक मुभा दिली.
मजगतीं, म्हापशें कोर्ट जंक्शना वयल्या क्लॉक टॉवर सावन चारूय वटांनी फुटपाथ बांदतले. हातूंत क्लॉक टॉवर ते आझिलो हॉस्पिटल हो फुटपाथ म्हापशें पालिके वतीन बांदला. ह्या कामां खातीर प्रक्रिया सुरू करतले. मात ताचे पयलीं लोकसभा वेंचणुकेची आचारसंहिता लागू जाल्यार निविदा काडप, वर्क ऑर्डर दिवप अश्यो गजाली करपाक मेळच्यो ना. ताका लागून हीं कामां वेंचणूक प्रक्रिया पुराय जाय मेरेन आडकून उरपाची शक्यताय आसा, असो मुद्दो उच्च न्यायालयांत हाजीर केलो. ह्या कामांकूय आचारसंहिता लागू जावची ना, अशें उच्च न्यायालयान ह्या वेळार स्पश्ट केलें. आचारसंहिता लागू जाली तरी प्रक्रिया सुरू दवरची, अशे निर्देश जारी केले.
क्लॉक टॉवर ते टॅक्सी स्टॅण्डा मेरेनच्या फुटपाथा खातीर पीडब्ल्यूडीन प्रक्रिया सुरू केल्या. ह्या कामाकूय आचारसंहिता लागू जावची ना. तशेंच क्लॉक टॉवर ते झेवियर कॉलेज आनी क्लॉक टॉवर ते धुळेर हांगचोय फुटपाथ बांदपाच्या कामांक आचारसंहिता लागू जावची ना, अशें उच्च न्यायालयान स्पश्ट केलां.