भांगरभूंय | प्रतिनिधी
म्हापशें, प्रतिनिधी ः म्हापशेंचें फामाद सेंट जेरोम चर्चीचें वर्सुकी मिलाग्रीस सायबिणीचें (अवर लेडी ऑफ मिराकल्स) फेस्त सोमार १५ एप्रिलाक मनयतले. ह्या फेस्ताक गोंयां सयत शेजारच्या राज्यांतले हजारांनी भावीक येवन सायबिणीचे मुर्तीक तेल अर्पण करतात. फेस्ता निमतान शेनवारा ६ ते आयतार १४ एप्रील अशे णव दीस चर्चींत नोव्हेनां चलतात.
फेस्ताच्या दिसा १५ एप्रिलाक सकाळच्या १० वरांचेर प्रार्थना जातली. जाल्यार त्या दिसा सकाळीं ५.३० वरांचेर, ७ वरांचेर, ८.३० वरांचेर, दनपरां १२ वरांचेर जावपी प्रार्थना इंग्लीशींत जातली आनी फेस्ताच्या प्रार्थने सयत सांजेवेळार ४ आनी ५.१५ वरांचेर जावपी प्रार्थना कोंकणींतल्यान जातल्यो.
मिलाग्रीसच्या फेस्ता निमतान इगर्जेंत सेगीत पांच दीस विवीध सांस्कृतीक आनी मनरिजवणेच्या कार्यावळींचें आयोजन केलां. तीन तियात्र, परंपरीक खेळ आनी हावजी सयत हेर कार्यावळींचो हातूंत आसपाव आसा. सध्या इगर्जी वतीन ह्या फेस्ताची तयारी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
