म्हापशेंची ‘नंदादीप’ ही मुख्यालय इमारत सरकाराक विकली

भांगरभूंय | प्रतिनिधी

बेगोबेग सुवात खाली करपाची सरकाराची नोटीस

म्हापशें : म्हापशें अर्बन को-ऑपरेटिव्ह बँक, गोंयची (म्हापशें अर्बन) म्हापशेंची ’नंदादीप’ ही मुख्यालय इमारत सरकाराक विकल्या आनी सरकारान बेगोबेग सुवात खाली करपाची नोटीस दिल्या. ह्यान फुडें लिक्विडेशन प्रक्रियेचें काम रेयश-मागुश फांट्यांतल्यान सुरू उरतलें.
सरकाराचे नोटीसी प्रमाण लिक्विडेटरान हें मुख्यालय रिकामी करपाची प्रकिया सुरू केल्या. हाका लागून ह्यान फुडें ’नंदादीप’ इमारतींत कसलोच वेवसाय जावचो ना. तशेंच लेखी फायली आनी नोंदी नश्ट करपाचें आशिल्ल्यान, बँकेकडेन कसलीच छापील कागदपत्रां उपलब्ध आसच्यो ना, फकत संबंदीत संगणकीकृत म्हायती उपलब्ध आसतली, हाची भागधारक, ठेवीदार, कर्जदार, आदले कर्मचारी आनी सामान्या जनतेन नोंद घेवची, असो उलो भौशीक नोटीस जारी करीत बँकेचे सरवेवस्थापक शैलेंद्र सावंत हांणी मारला.
सरकारान नंदादीप ही इमारत विकत घेतिल्ल्यान ती सरकाराच्या ताब्यांत दितले. हाका लागून म्हापशें अर्बन बँकेच्या लिक्विडेटर प्रक्रियेचें फुडलें काम रेयश-मागूश शाखेंतल्यान सुरू केलां, अशी म्हायती सरवेवस्थापक शैलेंद्र सावंत हांणी दिली.
मजगतीं, हलींच गोंयच्या मुंबय उच्च न्यायालयान म्हापशें अर्बनचें प्रधान कार्यालय आशिल्ली नंदादीप इमारत राज्य सरकाराक ताब्यांत घेवपाक मेकळीक दिल्ली.
दिवाळखोरींत काडिल्ले हे बँकेच्या मुख्यालय इमारती खातीर सरकारान म्हापशें शार पीटीशीट नंबर १५५ आनी चलपी नंबर २/१, २/२,२/३ ही जमीन संपादीत करून बँकेक दिल्ली. उपरांत हे सुवातेर सरकारा वांगडा करार करून ही नंदादीप इमारत बँकेन उबी केल्ली. सरकारान हे इमारतीचें मुल्यांकन २५ कोटी रूपया निश्‍चीत करून ही रक्कम बँकेच्या लिक्विडेटरा कडेन मार्च २०२६ दिसा दिल्ली.
तशेंच, बहुराज्य सहकारी संस्था अधिनियमांतल्या तरतुदीं प्रमाण ही रक्कम विनियोजीत करची. तशेंच ही रक्कम असुरक्षीत ठेवीदारांक वा अशी वसुली मेळपाची वाट पळोवपी हेरांक यथाप्रमाण (प्रोरो रेटा) तत्त्वाचेर वा अधिनेमान नमूद केल्ल्या हेर खंयचेय पद्धती प्रमाण वाटप करचें आनी ह्या २५ कोटी रुपयांच्या निधीचो विनियोग नेमक्या खंयचे पद्धतीन केला, ते पद्धतीचो तपशील फुडले सुनावणे वेळार सादर करचो, अशे निर्देशूय उच्च न्यायालयान लिक्विडेटराक आदेश पत्रात दिल्ले.