म्हापशेंची दुर्घटनाग्रस्त इमारत रिती करपाचे पालिकेचे निर्देश

भांगरभूंय | प्रतिनिधी

कोसकार अ‍ॅण्ड केसरकार इमारत धनी आनी भाडेकारांक सात दिसांची मुजत

म्हापशें: पोकळेवाडो, फेअरा बायक्सा, म्हापशेंच्या दुर्घटनाग्रस्त कोसकार अ‍ॅण्ड केसरकार इमारतीची सुवात सात दिसां भितर रिती करपाचे निर्देश नगरपालिकेन इमारत धनी आनी भाडेकारांक नोटीस धाडून दिल्या.

फाटल्या शुक्रारा 7 जून दिसा सकाळीं 11.30 वरांचेर जीर्ण जाल्ल्या कोसकार अ‍ॅण्ड केसरकार काँक्रिटाचो गच्चेचो पाखो कोसळून पार्क केल्ल्या चार मोटारींचें लुकसाण जालें. जाल्यार एक दुकानदार किरकोळ जखमी जाल्लो.

हे दुर्घटनेचे फाटभुंयेर म्हापशें पालिका मुख्याधिकारी चंद्रकांत शेटकार हांणी इमारत धनी पी. ए. कोसकार आनी डी. व्ही. केसरकार तशेंच भाडेकार (ओक्युपायर) देवेंद्र धावजेकार, नरसिंवा नायक, जनता ट्रेडींग, प्रभाकर धावजेकार, डॉ. आतॉव डिसोझा, प्रदीप काणेकार आनी उमेश पै हांकां ही इमारत रिती करपाची नोटीस दिल्या. ह्या नोटिसेची प्रत जिल्होधिकारी, उपजिल्होधिकारी, नगरविकास संचालक, म्हापशें उजो पालोवपी दळाचे अधिकारी आनी म्हापशें पुलीस निरिक्षकांक धाडून दिल्या.

ह्या एक माळ्याच्या इमारतीचो तळमाळ्या वेलो काँक्रिटाचो पाखो कोसळ्ळो आनी उरिल्ली इमारत जीर्णवस्थेंत असा. जी खंयच्याय खिणाक कोसळून सर्वसामान्यांच्या जिविताक आनी मालमत्तेक घात निर्माण जावंक शकता. तशेंच वायट घडणूक लेगीत घडूंक शकता.

ताका लागून नगरपालिका कायदो कलम 190(1) (2) आनी (3) त्या अधिकारा प्रमाण इमारतीची सुवात जाता तितले बेगीन रिती करची अशे आदेश मुख्याधिकाऱ्यांनी दिल्यात. तशेंच कसलीय वायट घडणूक घडची न्हय म्हूण इमारत वाठाराक बॅरिकेड करात, इमारतीचे दुरुस्ते खातीर योग्य पावलां उबारात आनी इमारत संरचनात्मक नदरेक थीर आसा काय ना हाची गोंय अभियांत्रिकी म्हाविद्यालय, फर्मागुडी हांचे वतीन अहवाल सादर करात असो निर्देश लेगीत मुख्याधिकाऱ्यांनी दिला.

नोटीस मेळिल्ल्याचे तारखे सावन 7 दिसां भितर आदेशाची कार्यवाही जाली ना जाल्यार भौशीक हिता खातीर आनी जिवीत आनी मालमत्तेचें रक्षण करपा खातीर गरजेची ती कारवाय सुरू करतले असो स्पश्ट आदेश लेगीत मुख्याधिकारी शेटकार हांणी वयले इमारत धनी आनी भाडेकारांक दिल्यात.