भांगरभूंय | प्रतिनिधी
भांगरभूंय । प्रतिनिधी
बेळगांवः म्हायद ही गोंयची जीव दायिनी आसा. आनी तिचे वयलो गोंयचो हक्क सिद्ध करपाक जाय त्यो सगल्यो गजाली आमी करतले. गोंयची हितराखण करपी आदेश सर्वोच्च न्यायालय दितलें अशी आस्त गोंयचे मुख्यमंत्री डॉ प्रमोद सावंत हांणी बेळगांव लोकसभा मतदारसंघांत भाजपाचे उमेदवार हांणी आपलो उमेदवारी अर्ज दाखल करचे पयलीं आयोजीत केल्ल्या शक्ती प्रदर्शना वेळार बुधवारा पत्रकारांक सांगले. आमचे खातीर म्हादय व्हो वेंचणुकेचो विशय ना अशेंय तांणी सांगलें.
गोंयचें पर्यावरण, पियेवपाचे उदक, रानां आनी रानां जिवाची राखण तशेंच शेता खातीर म्हादयची आमकां सामकी गरज आसा. म्हादय गोंयांतल्यान सदांच व्हांवपाक जाय अशें तांणी सांगलें. कर्नाटक म्हादयचें उदक घुंवडावपाक सोदता हे विशीं विचारलें तेन्ना कर्नाटका खातीर म्हादय व्हो फकत वेंचणुकेचो विशय आसा. आमचे खातीर तशें ना. म्हादय ही आमची जीव दायिनी आनी तिची राखण करपा खातीर आमी सर्वोच्च न्यायालयांत गेल्यात. केंद्र सरकार आनी प्रवाह (प्रोग्रेसीव्ह रिवर ऑथेरिटी फॉर वेलफेर अॅण्ड हार्मोनी) हांच्या सामकार आमी आमचो दावो दवोरला अशें तांणी सांगलें.
म्हादयचो प्रस्न सद्या सर्वोच्च न्यायालयांत प्रलंबीत आसा. राष्ट्रीय रानां जीव मंडळ म्हायद वाठारांत जें कायद्यान करप शक्य आसा तितलेंच कर्नाटकाक घडये करपाक दितलें अशें आमकां दिसता. कर्नाटकाक पियेवपाच्या उदकाची जितली गरज आसा ताचे परस चड आमकां पर्यावरणाची राखण आनी म्हादय अभयारण्याची गरज आसा. प्रवाहा वतीन कर्नाटकाक म्हादय देंगणांत चलयल्ल्या कामाची पळोवणी करतले अशी म्हायती मुख्यमंत्र्यान दिली.
केंद्रीय येरादारी मंत्री नितीन गडकरी हांणी दोन पदरी चोर्ला रस्त्याक मंजुरी दिल्या. कर्नाटकाच्या रानां खात्या कडल्यान ना हरकत दाखलो मेळपाक कळाव लागल्ल्यान हें काम सुरू जावपाक शकलें ना. चोर्ला घार रस्त्याची दुरुस्ती पावसा पयलीं करून घेवपा खातीर राष्ट्रीय म्हामार्ग प्राधिकरण आनी कर्नाटक सरकारा कडेन आमी यत्न करतले अशें तांणी सांगलें.
—————–
गोंयांत आनी शेजारच्या कर्नाटकांत
भाजपाचेंच जैतः मुख्यमंत्री डॉ सावंत
भांगरभूंय । प्रतिनिधी
बेळगांवः गोंयच्या दोनूय लोकसभा मतदारसंघांत तशेंच गोंयच्या शेजाराक आशिल्ल्या कर्नाटकांतल्या लोकसभा मतदारसंघांत भाजपाच्या उमेदवारांचें जैत निश्चीत आसा तशेंच लागींच्या फुडाराक कर्नाटकांत भाजपाचें सरकार येतलें असो दावो गोंयचे मुख्यमंत्री डॉ प्रमोद सावंत हांणी केला. बेळगांवचे भाजपाचे उमेदवार जगदीश शेट्टर हांणी आपलो उमेदवारी अर्ज भरचे पयली बेळगांव आनी खानापूर वाठारांत आयोजीत केल्ल्या मेळाव्यांत ते उलयताले.
फाटल्या धा वर्सांत प्रधानमंत्री नरेंद्र मोदी हांणी विकसीत भारताची केल्ली प्रगती लोकांनी पळयल्या. उमेदवार म्हत्वाचे आसले तरी लोक कमळाक मतां दितले हातूंत दुबाव ना. लोक पंतप्रधान मोदीजी हाच्या दूददृश्टीक मतां दितले. काँग्रेस जें पन्नास वर्सांत करपाक शकलो ना तें मोदीजीन धा वर्सांत करून दाखयलां. आमी मोदी हांच्या नांवाचेर निंबून आसात अशें तांणी सांगलें.
गोंय तशेंच कारवार आनी बेळगांवच्या भाजपाच्या उमेदवारांच्या प्रचारा खातीर चड वेळ दितलो अशे तांणी सांगलें. जगदीश शेट्टर हे हुबळीचे आसात मात वेंचणूक बेळगांवच्यान लडयतात तेन्ना तांका कितली संद आसा अशें विचारलें तेन्ना शेट्टर हे भाजपाचे वरिश्ठ फुडारी आसात आनी मुख्यमंत्री आसतना तांणी पुराय कर्नाटकाचे उदरगतीचें काम केला. कर्नाटकांतले लोक तांच्या फाटल्यान आसात आनी कर्नाटकांतल्यो 28 सुवातो भाजपा जिखतलो असो हावेस मुख्यमंत्र्यान उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
