म्हादय पात्राचे पळोवणे खातीर ‘प्रवाहा’चो हयकार

भांगरभूंय | प्रतिनिधी

भांगरभूंय । प्रतिनिधी : म्हादय न्हंयेवेल्या कळसा भंडुरा प्रकल्पांची जोड पळोवणी करपाक ‘म्हादय प्रवाहा’न हयकार दिला. ‘प्रवाहा’न गोंयाक पळोवणे खातीर आपल्यो सुचोवण्यो सादर करपांक सांगला. सोमार सांजे वा मंगळारा सकाळीं आमी तांकां हो प्लॅन दितले, अशें उदका स्रोत मंत्री सुभाष शिरोडकार हांणी सांगलें.
गोंयां बरोबर महाराष्ट्र, कर्नाटक आपल्योय सुचोवण्यो ‘प्रवाहा’ मुखार मांडतले. तीनय सुचोवणे आयले उपरांत ‘प्रवाह’ म्हादय पात्राच्या पळोवणे खातीर एक तारीख थारयतलो. उपरांत तिनूय राज्यां पळोवणे खातीर आपले प्रतिनिधी नेमतली, अशें मंत्र्यान सांगले.
पळोवणी आरखडो ही सुचोवणी आमी ‘प्रवाहा’मुखार मांडतले. म्हादय न्हंय पात्राच्यो खंयच्यो सुवाती आमकां पळोवपाक जाय तें आमी सुचोवणेंत मांडटले. उपरांत ‘प्रवाह’चे चेअरमन तिनूय राज्यांक आपोवन हे विशीं चर्चा करून निर्णय घेतले आनी पळोवणेची तारीख थारायतले, अशें शिरोडकार हांणी सांगलें
13 फेब्रुवारी 2023 त ‘म्हादय प्रवाहा’ची पयली बसका जाली. उपरांत पळोवणे खातीर आमी तांकां 4 पत्रां बरयिल्लीं. पयलें पत्र जोड पळोवणे खातीर 29 ऑगस्ट 2023 दिसा उदका स्रोत खात्यान धाडिल्लें. उपरांत हाचो उगडास करपाक दुसरें 25 नोव्हेंबर 2023 क धाडलें आनी तिसरें 10 डिसेंबर 2023 आनी चवथें आनी निमणें पत्र 22 मार्च 2024 क धाडलें जोड पळोवणी करपा खातीर प्रवाहान आमका जाप दिली.
‘प्रवाहा’चें कार्यालय गोंयतच आसा म्हूण आमकां ताचो फायदो जातलो. प्रवाहाचे कार्यालय तात्पुरते उदका स्रोत खात्याचे इमारतींत तिसऱ्या माळ्यार आसा. तांकां सासणाची सुवात दिवपा खातीर पर्वरे आमी कार्यालय पळयलां आनी तांणी ती सुवातय पसंद केल्या, अशें शिरोडकार हांणी सांगलें.

….जाल्यार पळोवणी रद्द जावपाची शक्यताय?
महाराष्ट्रान आपल्यो सुचोवण्यो मांडल्यात. कर्नाटकांन अजून दिवंक नात, पुण जर कर्नाटकान आपल्यो सुचोवण्यो दिवपाक न्हयकार दिलो जाल्यार पळोवणी रद्द जातली काय, असो प्रश्न विचारलो तेन्ना श्री. शिरोडकार हांणी सांगलें की हो निर्णय ‘प्रवाहा’चेर निंबून आसा. ताचेर आमी कांय उलोवपाक शकनात.