म्हादय खातीर परतून जाहीर सभा

भांगरभूंय | प्रतिनिधी

आयतारा दरेकी घरांनी दिवली पेटोवन आरती करची

भांगरभूंय I प्रतिनिधी
पणजी : म्हादय वाटावपा खातीर गोंय सरकाराची न्यायालयीन लडाय सुरू आसतना ‘सेव्ह म्हादय सेव्ह गोंय’ मंचान जागृताये खातीर आंदोलन सुरू केलां. आंदोलनाच्या निमाण्या पांवड्यार पणजे आझाद मैदानाचेर जाहीर सभा जातली. सभेचें थळ आनी तारीख निश्चीत जावंक ना. दर म्हालांनी बसकां घेवपा सयत दरेकी घरांनी दिवली पेटोवप तशेंच म्हादय खातीर आरती जातली.
‘सेव्ह म्हादय सेव्ह गोंय’ मंचाची सोमारा पत्रकार परिशद जाली. मंचाचे निमंत्रक प्रा. प्रजल साखरदांडे, महेश म्हांब्रे, सचीव हृदयनाथ शिरोडकार, तनुज अडवलपालकार, अँथनी डिसिल्वा, सलमान खान, मारियान फेर्रांव हाजीर आशिल्ले. प्रा. प्रजल साखरदांडे हांणी आंदोलनाची कार्यावळ जाहीर केली.
‘सेव्ह म्हादय सेव्ह गोंय’ मंचान दरेकी म्हालांत समित्यो स्थापन केल्यात. दरेकी म्हालांत बसकांक सुरवात जाल्या. आंदोलना खातीर 72 वांगड्यांची सुकाणू समिती तयार केल्या. दरेकी म्हालांत बसका घेवन म्हादय विशीं जागृताय जातली. म्हादयचें उदक कर्नाटकात घुंवडायले जाल्यार गोंयचेर कितें विपरीत परिणाम जातलो, ते लोकांक पटोवन सांगतलें. शेनवार मेरेन म्हाला प्रमाण बसका पुराय जातल्यो. बसकांक लोकां कडल्यान बरो प्रतिसाद मेळटा.
आयतारा 12 फेब्रुवारीक दर एकल्यान घरांत धर्म तशेंच परंपरे प्रमाण म्हादयची पुजा करची. तशेंच रातीं साडे सात वरांचेर दिवली वा मेणवात पेटोवन म्हादय आंदोलनाक आपलो तेंको उक्तावचो. दिवली वा मेणवातीचे फोटे शॅर करपाक हरकत ना. सगल्या धर्माच्या लोकांनी म्हादयची पुजा करून दिवली पेटोवची, असो उलो ‘सेव्ह म्हादय सेव्ह गोंय’ मंचान केलां.
म्हादय आरतीचें आयोजन
मांडवी पुलाचेर 16 फेब्रुवारीक म्हादय खातीर आरती जातली. सगल्या धर्माच्या लोकांनी पुलाचेर एकठांय जावन आरती वा प्रार्थना करची. ख्रिस्तांव भाव आपले पद्दतीन, मुसलमान भाव तांचे पद्दतीन जाल्यार हिंदू लोक हिंदू पद्दतीन आरती करतले.
निमाण्या पांंवड्यार जाहीर सभा
म्हाल पांवड्याचेर बसका जाले उपरांंत उत्तर गोंय तशेंच दक्षीण गोंयांंत सभा जातल्यो. पणजेत जाहीर सभा जातली. ही सभा विक्रमी जातली. जनमत कौला परस चड लोक हे सभेक एकठांंय येतले, अशें प्रा. प्रजल साखरदांंडे हांंणी सांंगलांं.
आयतारा पुराय गोंयांतल्या नागरिकांनी म्हादयचें जतनाये खातीर सांज वेळार दिवली पेटोवन आपलो तेंको जाहीर करचो.