म्हादय: कर्नाटकान पर्यावरणा संबंदी चुकीची म्हायती दिल्ल्याचो दावो

भांगरभूंय | प्रतिनिधी

गोंय सरकाराचें क्षेत्रीय अधिकार समितीक पत्र

पणजी: कळसा कानाला वयल्या प्रकल्पा संबंदी कर्नाटकान पर्यावरण मंत्रालयाच्या क्षेत्रीय अधिकार समितीक दिल्ली म्हायती चुकीची आशिल्ल्याचो दावो करपी पत्र गोंय सरकारान समितीक धाडलां. कर्नाटक, समितीची कशी दिशाभूल करता ताचो नियाळ पत्रांत घेतला अशी म्हायती सरकारी गोपांनी दिली.

बंगळुरूंत जाल्ल्या पर्यावरण मंत्रालयाच्या क्षेत्रीय अधिकार समितीचे बसकेंत कर्नाटकाच्या कळसा विशींचो प्रस्ताव मंजुरे खातीर आयिल्लो. ताचे आदीं समितीन ह्या प्रकल्पाचे फाटभुंयेर कर्नाटका कडल्यान पर्यावरणा विशीं संबंदीत कांय जापो मागल्यो. तातूंत कर्नाटकान म्हादय अभयारण्य कळसा प्रकल्पा पसून 10 किलोमिटरा परस पयस आशिल्ल्याचें सांगिल्लें. पूण हो प्रकल्प फक्त 200 मिटर अंतराचेर आसा.

हाचे बगर हेर कांय जापोय कर्नाटकान चुकीच्यो दिल्यात. म्हादयचो प्रस्न उदक तंटो लवाद आनी सर्वोच्च न्यायालयांत आसून लेगीत कर्नाटकान बेकायदो रितीन म्हादयचें उदक घुंवडायलां. ताचो फटको म्हादय अभयारण्यांतल्या जैविविधतायेक बसला. ताका लागून गोंयच्या मुखेल रान वॉर्डनान कर्नाटकाक ‘कारणां दाखय’ नोटीस धाडल्या. ताची जाप अजून आयिल्ली ना, अशेंय पत्रांत म्हणिल्ल्याचें गोपांनी सांगलें.

मजगतीं, क्षेत्रीय अधिकार समितीन मंजुरे खातीर आयिल्लो कळसा प्रकल्पाचो प्रस्ताव मुखार धुकलिल्लो आसून सुक्या वाठारांत वनीकरणा खातीरची येवजण तशेंच हो प्रकल्प व्याघ्र कॉरिडॉरांत येत आशिल्ल्यान गरजेचे ते उपाय करपा विशीं सविस्तर म्हायती दिवपाचे निर्देशूय कर्नाटकाक दिल्यात.

गोंयचेंच जैत जातलें: मुख्यमंत्री

बुधवारा मुख्यमंत्र्याच्या सरकारी निवासस्थानार पत्रकार परिशदेंत पत्रकारांनी मुख्यमंत्री डॉ. प्रमोद सावंत हांकां केंद्रीय गृह मंत्री अमीत शाह हांणी म्हादय विशीं केल्ल्या उलोवपा वयल्यान विचारलें. त्या वेळार तांणी ह्या विशयाचेर उलोवपाचेर टाळ्ळें. आमचो कायदेशीर लढो घटमूट आशिल्ल्यान सर्वोच्च न्यायालयांत गोंयचेंच जैत जातलें, असो विस्वास तांणी परतून एकदां उक्तायलो.

थारावांक सरकाराचो तेंको: गुदिन्हो

म्हादय विशीं खूबशो पंचायती थाराव घेत आसात. ह्या थारावांक खूब म्हत्व आसा. ताका लागून सरकाराचो थाराव घेवपी पंचायतींक तेंको आसतलो अशें पंचायत मंत्री मॉवीन गुदिन्हो हांणी म्हणलें. कर्नाटकांत वेंचणुकेचो काळ सुरू आशिल्ल्यान थंयचे फुडारी म्हादयचें राजकारण करीत आसात अशेंय तांणी म्हणलें.