भांगरभूंय | प्रतिनिधी
भांगरभूंय । प्रतिनिधी
दिवचलः कर्नाटक सरकारान फाटल्या कांय वर्सां सावन गोंयांतय येवपी म्हादय न्हंयेचो गळो अंदूपाचें काम बेकायदेशीरपणान चलयलां. कंणकुंबी हांगा कसलेंच काम क करचे नात अशी हमी दिवंत लेगीन चोरयां तांणी गोंयां आड कारस्थान सुरूच दवोरलां. गोंयचो पर्यावरण वावुरपी राजेंद्र केरकार हांणे सोमाराक कणकुंबीक भेट दिली तेन्ना हें कारस्थान उक्ताडार आयलें. कणकुंबी हांगा चर खणून खारजाचें काम चल्लां अशें केरकार हाणे पळयलें.
म्हादयचें उदक घुंवडानव तें मलप्रभेंत व्हरून सोडपा खातीर राखीव रानांतलीं झाडां मारून थंय खारीज बांदपाच्या कामाक कर्नाटकांत परत चालना दिल्या.गोंय सरकारान आतां चड सर्तक रावपाक जाय अशें केंरकार हांणे सांगलां. पावसा पयलीं हें काम पुराय केल्यार गोंयांचेर संकश्ट येतलें. गोंय सरकारान कर्नाटकाच्या दरेका हालचालीचर बारीकसाणेन नदर दवोरपाक जाय. सुशेगाद रावल्यार तें म्हारग पडटलें अशी शिटकावणी केरकारान दिल्या.
हे संबंदीची म्हायती सोशल मीडिया वयल्यान मेळटगीर गोंय सरकारान ताची गंभीर दखल घेवन ‘प्रवाह’ वतीन पळोवणी करपा खातीर उदकास्रोत खात्याक ताकां ताकतिकेन पत्र धाडून कळसा प्रकल्पाचे सुवातेची पळोवणी करपाची मागणी करपाक सांगलां. उदकास्रोत खात्याचो मुख्य अभियंतो प्रमोद बदामी हांचे कडेन संपर्क सादलो तेन्ना ताणे प्रवाहा कडेन पत्र वेव्हार केल्ल्याचें सांगलें. न्यायालय आनी उदका तंटो लवादाचो आदेशा कडेन आडनदर करून कर्नाटकांत सध्या जें काम चलयलां तातूंत हस्तक्षेप करपाक सांगलां अशें ताणे सांगलें
मुख्यमंत्र्यान घेतली दखल
मजगतीं, मुख्यमंत्री डॉ प्रमोद सावंत हांणी लवादाच्या आदेशाचें उल्लंघन करपाची कर्नाटकाची ही कृती बेकायदेशीर आसा. हे फांटभुंयेर उदकास्रोत खात्याक फावो ती कार्यवाही करपाचो आदेश दिला. गोंयचे हिताची राखण करपा खातीर कडक भूमिका घेतले अशे तांचे कडेन संपर्क सादलो तेन्ना सांगलें. प्रमोद बदमी हाणेय गोंयचो पंगडा कणकुंबी वचून पळोवणी करून सरकाराक अहवाल सादर करतोलो अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
