भांगरभूंय | प्रतिनिधी
कायदो तज्ञ सक्रीयः कर्नाटकाक परवाने मेळप कुस्तार
भांगरभूंय I प्रतिनिधी
पणजी : रानजीव कायद्याच्या कलम 29 प्रमाण अभयारण्य वाठारांतले उदक दुसरे न्हंयेंत घुंवडावपाक मेळना. सर्वोच्च न्यायालयांत ही गजाल स्पश्ट जाल्या. हाका लागून म्हादय प्रकरणात गोंयची बाजू घटमूट आसा. तशेंच कळसा – भांडुरा प्रकल्पा खातीर कर्नाटका कडेन परवाने नात. कर्नाटकान सर्वोच्च न्यायालयांत हे स्पश्ट सांगलां. गोंयची कायदेशीर लडाय योग्य मार्गान सुरू आसा, अशें अॅडव्होकेट जनरल अॅड. देविदास पांगम हांणी सांगलें.
कर्नाटका कडेन उदक घुंवडावपा खातीर गरजेचें परवाने नात. तशेंच तांणी प्रकल्पाचें काम सुरू करुंक ना. जे काम जालां, ते प्रकरण न्यायालयांत याचिका दाखल जावचे पयलीं जालां. प्रकल्पाचें काम सुरू जावंक ना, अशें कर्नाटकाच्या आदोगादान सर्वोच्च न्यायालयांत सांगलें. कर्नाटकान प्रकल्पाचें काम सुरू केले वा उदक घुंवडावपाचे यत्न केले, जाल्यार परत सर्वोच्च न्यायालयांत अर्ज दाखल करपाची मेकळीक गोंय सरकाराक दिल्या. हाका लागून आतां काम सुरू करप कर्नाटकाक शक्य जावचें ना.
सर्वोच्च न्यायालयांत कायदेशीर लडाय सुरूच उरतली. तशेंच रानजीव मंडळ परवानो, राना मंत्रालयाचो परवानो हांकाय गोंय सरकार विरोध करतले, अशें अॅडव्होकेट जनरल देविदास पांगम हांणी सांगलें.
कळसा – भांडुरा प्रकल्पाच्या डीपीआराक विरोध करपी अर्जाचेर (आयए) सोमारा सर्वोच्च न्यायालयांत सुनावणी जाली. सुनावणीचेर उलयतना पांगम हांणी ही म्हायती दिली.
म्हादयच्या अभ्यासा खातीर रिचर्ड डिसोझांची सल्लागार पदार नेमणूक
म्हादय प्रस्नाचेर सरकारान दाखल केल्ले याचिकेचेर सर्वोच्च न्यायालयांत जुलयांत सुनावणी जातली. पर्यावरणी तशेंच विज्ञानीक अभ्यास करपा खातीर सरकारान आदले राना संरक्षक रिचर्ड डिसोझा हांची सल्लागार म्हूण नेमणूक केल्या. उदका पुरवण खात्याचे मंत्री सुभाष शिरोडकार हांणी हे विशींची फायल मंजूर केल्या.
म्हादयच्या अभ्यासा खातीर अभियंते तशेच विज्ञानिकांची नेमणूक जावपाची आसा. म्हादय प्रस्नाचो अभ्यास करपा खातीर सरकारान सभाघर समिती स्थापन केल्या. सभाघर समितीची एक बसका जाल्या. हे बसकेंत कायदेशीर तशेंच विज्ञानीक अभ्यास करपा खातीर सल्लागार, विज्ञानीक तशेंच तज्ञांची नेमणूक करपाचो निर्णय जाला. ते प्रमाण रिचर्ड डिसोझा हांचे नेमणुकेक उदका पुरवण खात्याच्या मंत्र्यांनी मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
