भांगरभूंय | प्रतिनिधी
सरकारांतल्या मंत्र्यांची गृहमंत्री अमीत शाह हांच्या विधानाचेर टिका
भांगरभूंय I प्रतिनिधी
पणजी : म्हादय प्रकरणांत गोंयची कायदेशीर बाजू घटमूट आसा. कायदेशीर बाजू घटमूट आशिल्ल्यान गोंया खातीर बेगिनूच सकारात्मक निर्णय जातलो. गोंयच्या हिता खातीर आपूण बांदील आसा, अशें मुख्यमंत्री डॉ. प्रमोद सावंत हांणी सांगलें. उदका पुरवण खात्याचे मंत्री सुभाष शिरोडकार तशेंच पर्यावरण खात्याचे मंत्री निलेश काब्राल हांणी केंद्रीय गृहमंत्री अमीत शाह हांच्या विधानाचेर टिका करून तांचो दावो अमान्य केल्या.
म्हादयचो प्रस्न सुटावो जाला. म्हादयचें उदक कर्नाटकाक दिवपाक गोंयान मान्यताय दिल्या. म्हादयचें उदक कर्नाटकाक मेळटलें. भाजप सरकारान म्हादयचो प्रस्न सुटावो केला, अशें विधान केंद्रीय गृहमंत्री अमीत शाह हांणी बेळगांवां सभेंत केलें. ह्या विधानाक लागून गोंयांत खवदळ पडला. आयतारा कोरगांवां, केरी आनी हेर ग्रामसभांनी निशेधाचे थाराव संमत केले. सेव्ह म्हादय, सेव्ह गोंय फ्रंटान लोकांक रस्त्यार देंवपाचें आवाहन केलां. हाका लागून गृहमंत्री अमीत शाह हांच्या विधाना आड गोंयांत राज्यांत असंतोश निर्माण जाला. काँग्रेस सयत हेर विरोधी पक्षांनी मुख्यमंत्री डॉ. प्रमोद सावंत हांच्या राजिनाम्याची मागणी केल्या. कळसा – भांडुरा प्रकल्प हो अभयारण्य वाठारांत येता. अभयारण्य वाठारांत न्हंयेचें उदक दुसरे न्हंयेंत घुंवडावपाचेर बंदी आसा. हाका लागून उदक घुंवडावपाची कर्नाटकाची कृती बेकायदाे थारता. राज्य सरकारान सर्वोच्च न्यायालयांत अवमानाचो अर्ज दाखल केला. हाचेर बेगीन सुनावणी जावची अशी मागणी केल्या. गोंयच्या अर्जाचेर सुनावणी जातली. कायदेशीर बाजू घटमूट आशिल्ल्यान म्हादय प्रस्नाचेर गोंयचेर अन्याय जावचो ना, असो विस्वास मुख्यमंत्री डॉ. प्रमोद सावंत हांणी उक्तायला.
कर्नाटकांत विधानसभा वेंचणूक जावपाची आसा. हाका लागून तांणी म्हादयचें उदक घुंवडावपाक मान्यताय दिल्ल्याचे विधान करप हो प्रचाराचो भाग आसा व्हय? असो प्रस्न गृहमंत्र्यांक विचारलो. ताचेर म्हाका खबर ना, कर्नाटकांत कसो प्रचार करतात, अशें तांणी सांगलें.
लेगीत म्हादयचें उदक घुंवडावपाक गोंयची मान्यताय आशिल्ल्याच्या तांच्या विधानाचो हांव निशेध करता. म्हादयचें उदक कर्नाटकाक मेळचें ना. मुख्यमंत्री म्हादय प्रस्नाचेर गोंयच्या हिताची जपणूक करतले, अशें निलेश काब्राल हांणी म्हणलें.
सभाघर समितीची 8 फेब्रुवारीक बसका
म्हादय प्रस्नाचेर सरकारान सभाघर समिती स्थापन केल्या. सभाघर समितीची 8 फेब्रुवारीक बसका जातली, अशी म्हायती सुत्रांनी दिली. उदका पुरवण खात्याचे मंत्री सुभाष शिरोडकार हे सभाघर समितीचे अध्यक्ष आसात. विजय सरदेसाय, विरेश बोरकार, युरी आलेमांव, जीत आरोलकार, गणेश गांवकार, प्रेमेंद्र शेट, व्हेंझी व्हिएगश हे हेर वांगडी आसात. सभाघर समितीची बसका आपोवपाची मागणी आमदार विजय सरदेसाय हांणी केल्या. अजून मेरेन सभाघर समितीची बसका जावंक ना.
केंद्रीय गृहमंत्र्यांच्या विधानाचेर असमाधानी : शिरोडकार
मुख्यमंत्री डॉ. प्रमोद सावंत हांचे फुडारपणा खाला शिश्टमंडळान केंद्रीय गृहमंत्री अमीत शाह हांची भेट घेतिल्ली. हे भेटींत निवेदन सादर करपा सयत म्हादयची पुराय म्हायती दिल्ली. गोंयचेर अन्याय जावपाक दिवचो ना, अशें आस्वासन केंद्रीय गृहमंत्र्यांनी दिल्लें. कळसा – भांडुराच्या डीपीआराक दिल्ली मान्यताय अयोग्य आसा, अशें आमी सांगिल्लें. हाचे उपरांत कर्नाटकांत म्हादयचें उदक दिवपा विशीं अमीत शाह हांणी गोंयच्या विरोधांत विधान केले. हे विधान अयोग्य आसा, अशें उदका पुरवण खात्याचे मंत्री सुभाष शिरोडकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
