भांगरभूंय | प्रतिनिधी
मडगांव, प्रतिनिधी : गोंयची परंपरीक वळख म्हणून जाचे कडेन पळयता त्या ‘म्हाड्डोळच्या जायां’चें अस्तित्व धोक्यांत आयलां. ह्या जायांक सुरक्षीत दवरपाक तांकां ‘जीआय टॅग’ मेळोवन दिवपाक सरकारान यत्न करचे, अशी मागणी गोवा फॉरवर्डचे अध्यक्ष विजय सरदेसाय हांणी केली. मुख्यमंत्री, कृषीमंत्री आनी नगरनियोजन मंत्री ह्या तिगांयकूय सरदेसाय हांणी हे विशीं पत्र बरयलां.
गोंयच्या गिरेस्त सांस्कृतीक दायजाची राखण आनी तें तिगोवन दवरपाची गरज आसा. म्हाड्डोळच्यो जायोय गोंयचे सांस्कृतीक दायज. वाडत वचपी शारीकरणाक लागून ह्या जायांच्या मळ्यांचेर अतिक्रमण जावंक लागला, देखून ह्या जायांक संरक्षण दिवन हें दायज सांबाळपाची गरज सरदेसाय हांणी उक्तायली.
म्हाड्डोळच्या ‘नाईक फुलकार समाज’वतीन आतां मेरेन ह्या जायांची लागवड करतात. एका दसकां परस चड काळ ह्या समाजान नामनेची अशी जायांची पुजा उत्सव मनयला. १९१४ वर्सा गोंयांत प्लेगची साथ आयिल्ली तेन्ना ह्या समाजान म्हाड्डोळचे म्हाळसा देवीक जायांचे पुजेचें नवस आपयल्लें. तेन्ना सावन हे पुजेची परंपरा चालूच आसा. ही पुजा आतां गोंयची संस्कृताय जाल्या, हाचे कडेन सरकाराची आडनदर जाता अशें सरदेसाय हांणी सांगलें.
आधुनिकतेक लागून हे पारंपारीक मळे सोंपपाचे वाटेर आशिल्ल्यान तांची राखण करपाची गरज आसा अशें सरदेसाय हांणी पत्रांत सांगलां. ताका लागून ह्या जायांच्या मळ्यांचो अधिकार मळेवाल्यांक दिवपा खातीर खास तरतूद करपाची गरज सरदेसाय हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
