भांगरभूंय | प्रतिनिधी
खासदार सार्दीनः उमेदवारीची मागणी केल्या, पूण निर्णय पक्षाचो
भांगरभूंय । प्रतिनिधी
मडगांवः निमाणें खेपे लोकसभा वेंचणूक लडोवपाची आपल्याक संद दिवची, अशी मागणी आपणे पक्षा कडेन केल्या. हे आदीं चार खेपे लोकांच्या आनी काँग्रेस कार्यकर्त्यांच्या आदारान वेंचून आयला. उमेदवारी कोणाक दिवची हो पक्षाचो निर्णय आसता. आपूण राजकारणांत नवो न्हय. आपूण तत्वांचेर चलपी मनीस आशिल्ल्यान आपल्याक कोणूच विकतो घेवपाक शकना. खासदार आसलों वा नासलो तरीय लोकां वांगडा रावतलों, अशें खासदार फ्रान्सीस सार्दीन हांणी पत्रकार परिशदेंत सांगलें.
सार्दीन हांणी सांगलें, हे आदीं आपणे कोणाकूच फटोवंक ना, सेगीत लोकांच्या संपर्कांत रावलां. भाजपा वतीन फक्त आस्वासनां दितात, अशी सार्दीन हांणी टिका केली. लोकां वयल्या अन्याया आड आपूण सदांच आवाज उठयला. तिकेट कोणाक दिता तें पळयले उपरांत फुडली भुमिका थारायतलों, अशेंय सार्दीन हांणी सांगलें.
स म्हयन्यां भितर खण वेवसाय सुरू करपाचें भाजपाचें आस्वासन पुराय जावंक ना. गोंया वयलें रीण 35 हजार कोटीं वयर पावलां. रीण काडून झेत मारतात. लोकांच्या पयशांचो गैरवापर चल्ला. कोळशा आड भाजपाचे वास्कोचे आमदार उलयता. दोट्टी रेल्वे मार्ग लोकांचेर थापचो न्हय, अशें लोकांनी सांगलां, पूण तेंवूय आयकूंक ना. पणजी स्मार्ट सिटीच्या नांवा खाला लोकांक त्रास जाता. थंयच्या अपघातांनी वाड, भलायकेच्यो समस्या आनी वेवसाय लेगीत ठप्प जाल्यात. उदरगत जाय, पूण लोकांच्या माध्यार रिणाचो दोंगर उबारून न्हय. वेंचणूक लागीं पाविल्ल्यान गॅस सिलिंडरा वयलें दोन रुपया उणे करून लोकांक फटयतात. भ्रश्टाचाराच्या आरोपा खाला देशांतल्या दोन मुख्यमंत्र्यांक बंदखणींत घातल्यात. दरेका कामांत कमिशन घेताले हे खातीर कर्नाटकांतलें सरकार पडलें. शुन्य भ्रश्टाचार सरकारचो फक्त एक फार्स आसा. भ्रश्टाचार भाजपान कायदेशीर केला. केंद्रीय तपास यंत्रणांक विरोधी पक्षा फाटल्यान लावन चेपण हाडटात. भाजपान आमदार विकते घेतल्यात, पूण मतदार थंयच आसात. कांय जाणांक खटल्यांचो हावको दाखोवन जाल्यार कांय जाणांक पयशे दिवन विकते घेतल्यात. महाराष्ट्रांत अजीत पवार हांचेर 70 हजार घोटाळ्यांचो आरोप केलो आनी आतां तांकां पक्षांत घेवन उपमुख्यमंत्री केला. ही भाजपाची निती, अशें सार्दीन हांणी सांगलें.
कांय सुवार्थी पाद्री भाजपा वांगडाः सार्दीन
कांय पाद्री जे सुवार्थी आसात, ते भाजपा वांगडा आसात. हेर सगळे पाद्री हे भाजपा विरोधांतूच आसात. तांकां हिंदुत्व नाका जाल्यार सर्वधर्मसमभाव जाय. भारतांतली विविधतायेंतली एकता म्हत्वाची आसा, पूण हिंदुत्वाची संकल्पना मान्य ना. कांय पाद्री आप वा तृणमूल काँग्रेसी वांगडा गेल्यात, ते काँग्रेसीच्या विरोधांत नाशिल्ले, तेवूय भाजपा विरोधीच आशिल्ले, अशें मत खासदार फ्रान्सीस सार्दीन हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
