भांगरभूंय | प्रतिनिधी
सिसी टिव्ही घालपाची नागरिकांची मागणी
वाळपय, प्रतिनिधी: सत्तरी म्हालांतल्या म्हाऊस ग्रामपंचायत वाठारातल्या वाळपय- होंडा मार्गार नागव्यां तयार जाल्लो कोयराचो ब्लॅक स्पॉट निमाणो पंचायतीन काडलो. हे विशींची बातमी प्रसिद्ध जाल्ली. मात हे सुवातेर कायमचे उपाय काडपाची मागणी नागरीक करतात. तशेंच सत्तरी म्हालांतल्या गटविकास अधिकार्यांनी हे विशींचे निर्देश पंचायतीक पयलींच दिल्यात. परत गटविकास अधिकार्यांनी उगडासा खातीर पंचायतीक पत्र धाडलां. ताची बेगोबेग अंमलबजावणी करची अशी मागणी नागरीक करतात.
फाटल्या धा वर्सां सावन ह्या रस्त्या कुशीक लोक हाडून कोयर उडयताले. ताका लागून हांगा घाण आनी कोयराची रास पडिल्ली. हे परिस्थितीचेर पंचायतीन कितेंय उपाय काडचे अशी मागणी खूब पयलीं सावन जाताली. मात हाचे कडेन पंचायतीन आड नदर केल्ली. जेन्ना कोयर उडयता तेन्ना आवाज केले उपरांत तो नितळ करता. मात अशी स्थिती परत निर्माण जावची न्हय म्हणून हाचेर कायमचो उपाय करपाची मागणी नागरीक करतात.
फाटल्या पंदरा दिसां सावन हे सुवातेर लोकांनी व्हडा प्रमाणांत कोयर हाडून उडयला, अशी खबर प्रसिद्ध जाली. उल्लेख केल्ल्या वाठारांतलो उडयल्लो कोयर उखलून वाठार नितळ करचो अशी मागणी नागरिकांनी केल्ली. कारण हो वाठार वाळपाय-होंडा मदल्या मुखेल रस्त्यांचोच एक भाग. हांगा कोयराची रास पडिल्ली. हाका लागून नागरीक पंचायत मंडळाचेर टिका करताले.
निमाणें हे विशीं पंचायतीन दखल घेवन हो कोयराचें राज्य जाल्लो वाठार नितळ केलो. मात येवपी काळांत हांगा परत कोयर उडोवपाची शक्यताय आसा. हांगा जे लोक कोयर उडयतात तांचो सोद लागना. ताका लागून हांगा सिसीटिव्ही कॅमेरा बसयल्यार तांचो सोद घेवप सोपें जातलें, अशीय मागणी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
