भांगरभूंय | प्रतिनिधी
पणजी : म्हस रस्त्यार आडवी येतकच एसटी बशीक आपटता आनी मुखार शेतकार, बस ड्रायव्हर, प्रवाशां मदीं बरोचवेळ बोवाळ चलता….. पु. ल. देशपांडे हांची ‘म्हैस’ ही विनोदी कथा मुळांतूच वाचपाची. अशीच एक म्हैस ताळगांवां बोवाळाक जापसालदार थारल्या. पणजे पुलिशेंत ही कागाळ पावल्या. पुलीस स्टेशनांत कागाळदार सदांच येतात. मात शेनवारा दनपरां एक म्हस आयली. म्हणल्यार आपूण जावन येवंक ना. तिका ताळगांवांच्या शेतकारांनी हाडली. शेताचें लुकसाण करपी हे म्हशीक तांणी धरली आनी पुलीस स्टेशनांत हाटडली. शेतकारांनी म्हशीक आनी तिच्या धनयाक ताब्यांत घेवपाची मागणी पुलिसां कडेन केल्या.
हे विशीं चड म्हायती प्रमाण, कानाक टॅग आशिल्ली एक म्हस ताळगांवां शेताचें लुकसाण करताली. म्हशीन शेतांतलें पीक खाल्लेंच, वांगडा हांगा लायिल्लें उदकाचें पायपूय मोडून उडयलें. हाका लागून आमचें सुमार ६ लाख रुपयांचें लुकसाण जालें. हे विशीं आमी पणजे पुलिशेंत कागाळ केल्ली. मात तांणी आजूनय कसलीच कारवाय करूंक ना, अशें नेथन डिसोझा ह्या थळाव्या शेतकारान सांगलें.
शुक्रारा रातीं आमीच हे म्हशीक धरली. हे म्हशीच्या कानाक टॅग आसा. हाचो अर्थ तिका धनी आसा. पुलिसांनी टॅगा वेल्यान तिच्या धनयाक सोदून काडचें आनी आमकां आमची लुकसाण भरपाय दिवची. म्हशीच्या शेणाची न्यायवैद्यक चाचणी केल्यार तिणें काल कितें खाल्लां हेंय समजपाक शकता. फाटल्या वर्साय अशेंच घडिल्लें. ह्यो गजाली कायमच्यो बंद जावपाक जाय अशी मागणी डिसोजा हांणी ह्या वेळार केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
