भांगरभूंय | प्रतिनिधी
खारेबांध वाठारांत घडिल्ली तिसरी घडणूक
मडगांव, प्रतिनिधी ः फाटले तीन दीस पडपी उटंगाराच्या पावसाक लागून खारेबांदांतल्या इम्यॅन्युल पिंटो हांच्या घराची वणत आयज फांतोडेर चारांक सुमार पडली. घरांत ते सुवातेर न्हिदिल्लो तांचो भाव कांय मिनटां पयलीं म्हशींचें दुद काडपाक उठिल्लो. देखून ताचो जीव वाटावलो. ह्या सप्तकांत खारेबांद वाठारांत घडिल्ली ही तिसरी घडणूक. नगरसेवक महेश आमोणकार आनी योगीराज कामत हांणी घडणुक सुवातेक भेट दिवन पळोवणी केली. पिंटो हांचे कडेन म्हशी आसात आनी ते दुदाचो वेवसाय करतात.
खारेबांध वाठारांतल्या आपल्या वॉर्डांत तीन घडणुको घडल्यो, पूण ह्या तीन घडणुकांनी कोणाक कांय जावंक ना अशें आमोणकार हांणी सांगलें. ह्या वेळार तांणी लुकसाण जाल्ल्या लोकांक आपूण मजत करतलों अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
