भांगरभूंय | प्रतिनिधी
पणजी : प्रधानमंत्री नरेंद्र मोदी हांणी हालींच १२ वर्सांचो कार्यकाळ पुराय केला. ह्या निमतान गोंय सरकारा वतीन तांच्या कार्यकाळांत सुरू जाल्ल्या म्हत्वाच्या येवजण्यांची म्हायती दिवपी पोस्टर प्रदर्शन चार सुवातांचेर आयोजीत केलां. सगल्या नागरिकांनी ह्या प्रदर्शनाक भेट दिवची असो उलो मुख्यमंत्री डॉ. प्रमोद सावंत हांणी मारलो. मंगळारा तांणी पणजी कदंब बसस्टॅण्ड वाठारांतल्या प्रदर्शनाक भेट दिली. ह्या वेळार आमदार राजेश फळदेसाय, रुडॉल्फ फर्नांडीस आनी हेर अधिकारी हाजीर आशिल्ले.
नरेंद्र मोदी हे भारताचे सगल्यांत चड काळ आशिल्ले प्रधानमंत्री जाल्यात. हे खातीर आमी गोंयचे जनतेचे वटेन तांकां परबीं भेटयतात.
तांच्या कार्यकाळांत केंद्रांतल्या तशेंच राज्यांतल्या डबल इंजिन सरकाराक लागून उदरगतीच्या कामांक गती मेळ्ळ्या. बारा वर्सांच्या काळांत नारी शक्ती, किसान शक्ती, युवा शक्ती आनी गरीब कल्याण ह्या चार स्तंभांचेर सरकार काम करता. आमी मुळाव्या सुविधां वांगडा मनशाचे उदरगतीकूय म्हत्व दितात. ह्याच आधारार आमचीं उदरगतीचीं कामां सुरू आसात, अशें मुख्यमंत्र्यानी म्हणलें.
बारा वर्सांच्या काळांत केंद्र सरकारान विवीध लोकहिताच्यो येवजण्यो सुरू केल्यात. हांची म्हायती सामान्य लोकांक जावचे खातीर हे प्रदर्शन आयोजीत केलां. पात्र लावार्थ्यां मेरेन येवजण पावोवपा खातीरय प्रदर्शन उपेगी थारतलें. हाका लागून एखाद्या तरणाट्याक शिश्यवृत्ती स्टँड अप इंडिया आनी येवजण्यांची म्हायती मेळटली. अशाच पद्धतीचें प्रदर्शन पणजी सयत म्हापश्यां, मडगांव आनी कुडचडेंच्या कदंब बसस्टॅण्ड वाठारांत १६ ते १८ जून मजगतीं आयोजीत केलां. हाचो लोकांनी लाव घेवचो, अणेंय तांणी मुखार म्हणलें.
आमदार राजेश फळदेसाय हांणी, प्रधानमंत्री नरेंद्र मोदी फाटलीं बारा वर्सां जालीं बरें काम करता. तांच्या काळांत घेतिल्ले म्हत्वाचे निर्णय, येवजण हांची म्हायती प्रदर्शनांतल्यान दिल्या. हाका लागून लोकांक फाटल्या बारा वर्सांनी जाल्ले देशाचे उदरगतीची म्हायती मेळटली. केंद्रा प्रमाण राज्य सरकारी ही लोकाभिमुख कामां करता. म्हजें घर येवजण हें ताचेंच एक उदाहरण. विकसीत भारत २०४७ आनी विकसित गोंय २०३७ चे ध्येय पुराय करपा खातीर सगल्यांनी यत्न करप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
