भांगरभूंय | प्रतिनिधी
पणजी : गोंय सरकारच्या ’म्हजें घर येवजणे’ खाला उत्तर गोंय जिल्ह्यांतल्या १ हजारां परस चड पात्र लावार्थ्यांक ९ जुनाक अदीकृत आदेश आनी सनदी वाट्टले. उत्तर गोंयचे जिल्लोधिकारी अंकित यादव हांणी आयज एके विशेश पत्रकार परिशदेंत ही म्हायती दिली. पणजेच्या इन्स्टिट्यूट मिनेझीस ब्रागांझा सभाघरांत सकाळच्या ११ वरांचेर हो सुवाळो जातलो. ह्या सनद वाटपाचे कार्यावळीक मुख्यमंत्री डॉ. प्रमोद सावंत हांचे सयत विवीध मतदारसंघांचे आमदार, मंत्री, उप-जिल्लोधिकारी आनी मामलेदार हाजीर रावतले.
जिल्लोधिकार्यान मुखार सांगलें, ‘म्हजें घर येवजणे’च्या विवीध घटकां प्रमाण आनी वेगवेगळ्या म्हालांतल्यान आयिल्ल्या अर्जांची खोलायेन तपासणी केल्या. आतां मेरेन उत्तर गोंयच्या १,००० परस चड लावार्थ्यांचे अर्ज मंजूर करून तांच्यो सनदी तयार केल्यात. फाल्या जावपी मुखेल कार्यावळी उपरांत, जिल्ह्यांतल्या उरिल्ल्या पात्र नागरिकांक हे येवजणेचो लाव मेळोवन दिवपा खातीर वेगवेगळ्या महालांनी आनी गांवांनी विशेश शिबिरां आयोजीत करतले.
मुख्यमंत्री डॉ. प्रमोद सावंत हांणी हे येवजणेचे उदरगतीचो स्वता आढावो घेतलो. जिल्लोधिकारी पावड्यारूय दर सप्तकांत ह्या कामाचें खर मॉनिटरींग करतात. सगले अर्ज एका निश्चीत काळांत़ निकालांत हाडपी प्रशासनाची मुखार भर आसा. हे येवजणेची प्रक्रिया आनी मार्गदर्शक तत्वां कायद्या प्रमाण पुरायेन स्पश्ट आशिल्ल्यान सनद वाटपा विशीं सध्या कसलेच तरेची कागाळ येवंक ना, अशेंय जिल्लोधिकार्यांनी स्पश्ट केलें.
‘म्हजें घर येवजणे’ वांगडाच जिल्लोधिकार्यांनी मान्सून पयलींचे तयारेचोय सविस्तर आढावो घेतलो. उत्तर गोंयचीं सगलीं आपत्ती वेवस्थापन नियंत्रण कक्ष पुरायेन सक्रीय केल्यांत. जिल्लो आनी राज्य आपत्ती वेवस्थापन प्राधिकरणाच्यो दोन म्हत्वाच्यो बसका जाल्यात. पुराय तयारीचेर बारकायेन लक्ष दवरतात. तशेंच, पावसांत रस्त्यांची वायट अवस्था टाळपा खातीर कलम १६३ खाला आदेश जारी केल्ल्यान, भौशीक बांदकाम विभागान १५ मे सावन नवे रस्ते खणपाक खर बंदी घातल्या.
Goa #Panjim #Timeboundmanner #PWD #MhajeGharYojna #SOP #AllotmentLetters #Beneficiaries
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
