भांगरभूंय | प्रतिनिधी
हिंदी साहित्यीक मोहन राकेश हे नाटककार, साहित्यीक. तांच्या साहित्याचेर खांडोळें सरकारी महाविद्यालयान इन्स्टिट्यूट मिनेझीस ब्रागांझाच्या जोड पालवान आयज 31 जानेवारीक एक दिसाचो परिसंवाद आयोजीत केला. ‘मोहन राकेश का साहित्यिक अवदान’ हो परिसंवादाचो विशय. उक्तावण सकाळीं 9:30 वरांचेर महाविद्यालयाच्या सभाघरांत जातले. मिनेझीस ब्रागांझाचे अध्यक्ष दशरथ परब मुखेल सोयरे तर गोरख मांद्रेकार मानाचे सोयरे आसतले.
गोंय विद्यापीठाची हिंदी विभाग मुखेली प्रा. वृषाली मांद्रेकार अध्यक्षस्थान सांबाळटली. केपें सरकारी महाविद्यालयाचे हिंदी विभाग मुखेली डॉ. ब्रिजपाल सिंह गहलोत बीज भाषण करतले.
ह्या वेळार नाट्य दिग्दर्शक डॉ. साईश देशपांडे ‘दिग्दर्शकीय दृष्टि से मोहन राकेश’ ह्या विशयाचेर विचार मांडटले. उपरांत निर्मला इन्स्टिट्युट ऑफ एज्युकेशनाची प्रा. अनघा देशपांडे मोहन राकेश हांच्या ‘आधे अधूरे’ नाटकातली ‘सावित्री’ची भूमिका सादर करतली.
‘मोहन राकेश की साहित्यिक दृष्टि और नाटक’ ह्या पयल्या सत्राचें अध्यक्षस्थान डॉ. रमिता गुरव सांबाळटली. ह्या सत्रात डॉ. किरण पोपकार, डॉ. प्रदीप जठार, डॉ. अर्चना गायतोंडे, प्रा. दीपक वरक, प्रा. ज्योती बोवालकर सोदनिबंद सादर करतलीं. दुसरे सत्र ‘मोहन राकेश का कथा साहित्य’ ह्या विशयाचेर जातले. तातूंत प्रो. वृषाली मांद्रेकार अध्यक्ष आसतली. डॉ. माग्दालीन डिसोजा, डॉ. संदीप लोटलीकार, प्रा. उमा प्रियोळकार सोदनिबंध सादर करतलीं.
‘मोहन राकेश का कथेतर साहित्य’ ह्या विशया वयल्या सत्रांत डॉ. वैशाली नायक, प्रा. मनीषा गावडे आनी प्रा. सायली मोरजकार सोदनिबंद सादर करतलीं. निमण्या सत्रात गोंय विद्यापीठाच्या हिंदी विभागाचे डॉ. बिपिन तिवारी, मिनेझीस ब्रागांझाचे अध्यक्ष दशरथ परब, महाविद्यालयाची प्राचार्य प्रा. पूर्णकला सामंत, उप प्राचार्य तशेंच हिंदी विभाग मुखेली डॉ. आशा गहलोत हाजीर आसतलीं.
विद्यार्थी आनी साहित्य रसिकांनी ह्या परिसंवादाक व्हड संख्येन हाजीर रावचें असो उलो प्रो. सामंत आनी डॉ. गेहलोत हांणी मारला.
मोहन राकेश (जल्म ८ जानेवारी १९२५, मरण- ३ डिसेंबर १९७२) नई कहानी चळवळीचे प्रणेते, मूळ सिंध प्रांतांतले, मागीर पंजाबांत आयले. अश्टताशी कादंबरीकार, नाटककार, कांय काळ शिक्षक.‘सारिका’ नेमाळ्याचे संपादक. आषाढ का एक दिन, आधे अधूरे हीं नाटकां. १९६८ त संगीत नाटक अकादमीचो पुरस्कार मेळ्ळो.
तांचें साहित्य – कादंबरी :- अंधेरे बंद कमरे 1971, अन्तराल 1972, न आने वाला कल 1968 ,काँपता हुआ दरिया (अपूर्ण), नीली रोशनी कि बाँहें
नाटक :- आषाढ़ का एक दिन, लहरों के राजहंस, आधे अधूरे, पैर तले की जमीन (अर्दकुटें, कमलेश्वर हांणी पूर्ण केलें.), सिपाही की मां, प्यालियां टूटती हैं, रात बीतने तक, छतरियां, शायद, हंः
एकांकी :- अण्डे के छिल्के, बहुत बड़ा सवाल, कथासंग्रह :- क्वार्टर तथा अन्य कहानियाँ, पहचान तथा अन्य कहानियाँ, वारिस तथा अन्य कहानियाँ, निबंध संग्रह :- परिवेश, अनुवाद :- मृच्छकटिक, शाकुंतलम्, प्रवासवर्णन :- आखिरी चट्टान तक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
