भांगरभूंय | प्रतिनिधी
फोंडें, प्रतिनिधीः रान खात्याच्या मोलेंच्या गेटी मुखार बुधवारा रातीं सुमार 11.30 वरांचेर कर्नाटकांतल्यान गोंयांत येवपी म्हाल येरादारी ट्रकाक उजो लागून 5 ते 6 लाखांचें लुकसाण जालें. फोंडें उजो पालोवपी दळाचे कर्मचारी पावचे पयलीं चेकनाक्याचेर आशिल्ल्या पुलिसांनी रान खात्याच्या टँकराच्या मजतीन उजो पालोवपाचो यत्न केलो. ट्रकांत आशिल्लो म्हाल उज्यांत लासलो.
मेळिल्ले म्हायती प्रमाण, केए- 22- बी- 6723 क्रमांकाचो ट्रक कर्नाटकांतल्यान गोंयचे वटेन येतालो. अनमोड घांटांर पावतकच ट्रक चालकाक फाटल्यान धुंवर येता, असो दुबाव आयलो. धुंवर टायरांतल्यान येता अशें समजून ड्रायव्हरान ट्रक मोल्यां गेटी मेरेन व्हेलो. त्या वेळार ट्रकाच्या फाटल्यान व्हडलो उजो लागलो. ट्रकाक उजो लागला हें कळटकच चेक पोस्टाचेर आशिल्ल्या पुलीस कर्मचाऱ्यांनी लागसारच्या रान खात्याच्या टँकराच्या उदकान उजो पालोवपाचो यत्न केलो. सुमार अर्द वर उपरांत फोंडें उजो पालोवपी दळाची गाडी थंय पावली. उजो पालोवपी दळान उजो नियंत्रणांत हाडलो. उज्यांत सुमार 5- 6 लाखांचो म्हाल उज्यांत लासलो.
कुळेंचे पुलीस उपनिरिक्षक सदानंद देसाय, हवालदार गौरेश सांगोडकार, धुलो शेंगडी, संदीप नायक, आनंद गावडे, रानां कर्मचारी राजा, फोंडें उजो पालोवपी दळाचे हवालदार संतोष गांवकार, गणेश गावडे (ड्रायव्हर), जितेंद्र भंडारी, आवेश प्रभुगांवकार, विशांत गांवकार आनी प्रमोद नायक हांणी उजो पालोवपाक मजत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
