भांगरभूंय | प्रतिनिधी
दोगां कामगारां सयत आनीक एकल्या आड गुन्यांव दाखल
पणजी: सवाय सोऱ्याच्या बॉक्सांनी मोलादीक सोऱ्याच्यो बाटल्यो भरून ताची विक्री करून धनयाक 40 लाख रुपयांची तोपी घाल्ल्या प्रकरणांत पणजी पुलिसांनी नाबो कुमार महाल (अस्तंत बंगाल), चित्ता जेना बालासोरे (ओडिसा) ह्या कामगारां सयत ज्या व्हायन स्टोरांत ह्यो बाटल्यो विकताले त्या बरेल हावज व्हायन स्टोराचो धनी सौरभ नुरालकरा आड गुन्यांव दाखल केला.
पणजी पुलिसांनी दिल्ले म्हायती प्रमाण ह्या प्रकरणांत पणजेंतल्या कासा बार्रेटो व्हायन स्टोराचे धनी कार्लुस बार्रेटो हांणी कागाळ दाखल केल्या. ते प्रमाण नाबो कुमार महाल आनी चित्ता जेना बालासोरे हे दोग जाण ताचे कामगार आसात. त्या दोगांनी ऑक्टोबर 2022 दिसा ते आतां मेरेन अफरातफर केल्या. तातूंत सवाय सोऱ्याच्या बॉक्सांनी म्हारग सोऱ्याच्यो बाटल्यो भरून सुमार 40 लाख रुपया मोलाच्या सोऱ्याची विक्री सांतिनेझ हांगासरल्या बरेल हावज व्हायन स्टोर ह्या दुकान धनयाक विकिल्ल्याचें म्हणलां.
ते प्रमाण पणजी पुलिसांनी नाबो कुमार महाल, चित्ता जेना बालासोरे ह्या कामगारां सयत बरेल हावज व्हायन स्टोराचो धनी सौरभ नुरालकर हाचे आड भादंसंच्या कलम 406,408, 420 आनी आरडब्ल्यू 34 खाला गुन्यांव दाखल केला. ह्या प्रकरणांत पणजी पुलीस निरिक्षक निखील पालयेंकार हांच्या मार्गदर्शना खाला महिला पुलीस उपनिरिक्षक सपना गांवस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
