भांगरभूंय | प्रतिनिधी
2010चो वस्ताद स्पेनाक पॅनल्टी शुटआवटांत 3-0 अशा फरकांनी हारोवन मोरोक्कोन पयलेच खेपे संवसारीक फुटबॉल सर्तीचे क्वॉर्टरफायनलींत सुवात मेळयली.
स्पेन पंगड सेगीत दुसरे खेपे प्री-क्वॉर्टरफायनलींत हारलो. फाटले खेपे ताका रशियेन पॅनल्टी शुटआवटांत हारयिल्लो.
आपले शिस्तबद्ध खेळा खातीर प्रसिद्ध आशिल्ल्या स्पेनाक मोरोक्कोचो गोलपोस्ट पॅनल्टी शुटआवटांत लेगीत भेदपाक जमलो ना. मोरोक्कोचो गोलकीपर बोनोन आपले कडेन आयिल्लो दरेक शॉर्ट आडायलो.
पयलीं 90 मिनटांचो खेळांत आनी उपरांत अॅक्स्ट्रा टायमांत लेगीत मॅच गोलाविणें बादाबाद उरिल्ल्यान निकाल लावपाक शुटआवटाचो आदार घेवचो पडलो.
सबिरीन मोरोक्कोचो पॅनल्टीचेर पयलो गोल केलो. ते उपरांत स्पेनाच्या सराबियान कीक गोलपोस्टाच्या खांब्यार मारली. ताका लागून मोरोक्को 1-0 असो मुखार गेलो. ते उपरांत मोरोक्कोच्या हकिम झियेचान दुसरी पॅनल्टी येसस्वी करीत आघाडी 2-0 अशी केली. ते उपरांत कार्लोस सोलेरान स्पेना वतीन दुसरो यत्न केलो. पूण, हो यत्न लेगीत बोनोन मोडून काडलो. तिसऱ्या यत्नांत मोरोक्को आनी स्पेन दोनूय पंगडांनी पॅनल्टी आडायल्यो. अखेरेक मोरोक्कोच्या अचरफ हकिमीन गोलपोस्टाचो अचूक वेध घेत पॅनल्टी शुटआवट 3-0 अशा फरकान जिखलो.अंदूंचे बाद फेरयेंतली खरी चुरशीची मॅच जाली ती ह्या पंगडां मदीं. मोरोक्कोन आदल्या वस्तादाक बरोच घाम काडलो. पयल्या अर्दांत मोरोक्कोन प्रतिस्पर्धी पंगडाच्या गोलपोस्टाचेर जबरदस्त हल्ले केले. तशेंच पळोवपाक गेल्यार स्पेनान चड वगत बॉल आपले कडेन दवरलो. पूण, मोरोक्को गोल करपाच्यो चड संदी तयार केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
