भांगरभूंय | प्रतिनिधी
पणजीः पीएम श्री येवजणे खाला नोंद आशिल्ल्या स्कुलांनी स्कूल सुरू जावचे पयल्या दिसा विद्यार्थ्यांक फळां आनी फुलां दिवन येवकार दिलो. मोरपिर्लाच्या सरकारी हायस्कुलांतले मुख्यध्यापिकेन विद्यार्थ्यांक आंबो दिवन पयल्या दिसा येवकार दिलो. पीएस श्री हांणी ह्या हायस्कुलाच्या उपक्रमाची दखल घेतल्या.
पीएम श्री ही केंद्रीय सरकाराची येवजण आसा. हे येवजणे खाला स्कुलांतल्या विद्यार्थ्यां कडेन विशेश लक्ष दितात. शिकोवपाचे पद्दतींत वेगळेवेगळे उपक्रम राबयतात. हे विशीं म्हायती दितना शिक्षण खात्याचे संचालक शैलेश झिंगडे हांणी सांगलें, पीए श्री येवजणे खाला 12 सरकारी हायस्कुलां नोंद जाल्यांत, आनी फुडाराक आनीक 12 हायस्कुलांची नोंद जातली.
स्कूल सुरू जावचे पयल्या दिसा विद्यार्थ्यांक विशेश तरेन ह्या शाळांनी येवकार दितात. असोच विशेश येवकार दितना केपेंच्या मोरपिर्ला सरकारी हायस्कुलांत विद्यार्थ्यांक आंबो दिवन स्कूल सुरू जालें. हायस्कुलाची मुख्यध्यापिका मारीया मोरेनो हांणी भुरग्यांक आंबे वांटून येवकार दिलो. मोरेनो हांकां राज्य पांवड्यार तशेंच राष्ट्रीय पांवड्यार पुरस्कार फावो जाला, अशें झिंगडे हांणी सांगलें.
राज्याच्या हेर शाळांनी फुलां दिवन येवकार दिलो. पूण मोरपिर्लाच्या सरकारी हायस्कुलान घेतिल्ल्या उपक्रमाची पीएम श्री हांणी दखल घेतल्या. काय वेंचीक स्कुलांचें उक्तावण तांणी आपल्या पोर्टलार घातलां, आनी तातूंत मोरपिर्ला हायस्कुलाचो आस्पाव आसा, अशी म्हायती झिंगडे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
