भांगरभूंय | प्रतिनिधी
पेडणें, प्रतिनिधी ः मोरजे पंचायत वाठारांतल्या विठ्ठलदास वाडो ह्या दर्यादेगेवेल्या वाठारांतल्या मुखेल रस्त्यार दर दिसा येरादारीची कोंयडी आसता. येरादारी पुलिसांनी हाचेर लक्ष दिवन योग्य कारवाय करची अशी मागणी समाज वावुरपी संजय कोले हांणी केल्या.
मोरजे विठ्ठलदास वाडो दर्यादेगेवेल्या वाठारांत व्हड प्रमाणांत पर्यटक येतात. तांकां गाडी पार्किंगाची योग्य वेवस्था नाशिल्ल्यान, सुवात मेळटा थंय ते गाडी पार्क करतात. रस्त्याच्या दोनूय वटांनी गाडयो पार्क करुन येरादारीची कोंयडी जाता. नो पार्किंग सुावतेर लेगीत कांय जाण गाडयो पार्क करुन दवरतात. ताका लागून थळाव्या लोकांक आनी यो-वच करप्यांक ताचो त्रास जाता. हे खातीर सरकारान आनी येरादारी पुलीसांनी योग्य दखल घेवन ताचेर उपाय येवजण आंखची अशीं मागणी वाहन चालक करतात.
तशेंच हेर दर्यादेग वाठारांतल्या प्रमाण मोरजे विठ्ठलदास वाडो दर्यादेग वाठारांतय रस्त्या कुशीक व्हड प्रमाणांत रेस्टॉरंट, सेक्स हॉटेलां, गेस्ट हावस, वेगवेगळ्या प्रकारचीं आस्थापनां उबारल्यात. पूण थंय येवपी गिरांयकांक गाडयां खातीर पार्किंगाची सुविधा ना. ताका लागून तें गिरायक मेळटा थंय गाडयो पार्क करतात. अशा रेस्टॉरंट, रिसॉर्टा आड पंचायतीन कारवाय करपाचे यत्न करचे. हाचेर पंचायत, थळावे आमदार, सरकारान लक्ष दिवन हे येरादारी समस्याचेर योग्य नियंत्रण मेळोवपा खातीर उपाय करचे अशी मागणी संजय कोले हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
