भांगरभूंय | प्रतिनिधी
पणजी: मोरजे दर्यादेगेर कांसव संवर्धन वाठारांत आशिल्ले मसंडभुंयेंत निमाणे संस्कार करपाक मुंबय उच्च न्यायालयाच्या गोंय खंडपिठान बंदी घाल्या. ह्या प्रकरणाची फुडली सुनावणी 26 मार्च दिसा जातली.
ह्या प्रकरणांत संजय रेलान हांणी उच्च न्यायालयांत याचिका दाखल केल्या. तातूंत तांणी राज्य सरकार, पर्यटन संचालक, गोंय दर्यादेग क्षेत्र वेवस्थापन प्राधिकरण (जीसीझॅडएमए), पेडणें उपजिल्होधिकारी रानसंरक्षक, मोरजी पंचायत, पेडणें मामलेदार, गोंय राज्य प्रदुशण नियंत्रण मंडळ (जीएसपीसीबी) आनी विलास मोरजे हांकां प्रतिवादी केल्यात.
हे विशींची बुधवारा न्यायालयांत सुनावणी जाली तेन्ना मोरजी दर्यादेगेर पर्यटन खात्याच्या कांसव संवर्धन वाठारांत 67 मिटर अंतराचेर मसंडभूंय आसा. थंय निमाणे संस्कार करतात. तशेंच हो वाठार दर्यादेग नियम क्षेत्रांत येत आशिल्ल्याचो मुद्दो उपस्थीत केला. संबंदीत वाठार कांसव संवर्धन वाठार जाहीर जावचे पयलीं सावन थंय निमाणे संस्कार करीत आशिल्ल्याची म्हायती न्यायालयांत सादर केली.
हे विशीं न्यायालयान दोनूय पक्षाची बाजू आयकून घेतले उपरांत थळाव्या नागरिकाक बाजू मांडपा खातीर एका सप्तकाची मुजत दिल्या. तशेंच तो मेरेन थंय निमाणे संस्कार करपाक बंदी घाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
