भांगरभूंय | प्रतिनिधी
पेडणें: मोरजे दर्यादेगेर प्रवाशांक रस्ताद सुण्यांचे बरेच त्रास सोंसचे पडटात. हे विशीं सरकारान सेगीत सुचवण्यो दिवन, तशेंच संबंदीत खात्यांक निर्देश दिवनय ह्या रस्ताद सुण्यांचेर कसलोच उपाय काडूंक ना. आतां ही परिस्थिती आनीक खर जातना दिसता.
पर्यटक, तशेंच कांय नागरीक सकाळीं शरिरीक कसरती करतात. हातूंत धांवप, योगा, चलप अश्यो एक्सरसायज करपा खातीर लोक दर्यादेगांचेर येतात. रेंवट भाग वापरिल्ल्यान पांयांचे स्नायू घटमूट जावप, घामांतल्यान शरिरांतल्यो निरुपेगी गजाली भायर पडप जाता. ह्यो सगल्यो लाव दिवपी गजाली करतना दर्यादेगांचेर डाव धरून आशिल्लीं रस्ताद सुणीं, तशेंच कांय पोशिल्लीं सुणींय लोकांच्या फाटल्यान लागतना दिसतात. मनशाक चारूय वटेन घेरो घालून तीं तांच्या आंगार वतात. तांकां चावतात. ही गंभीर गजाल जावन पडल्या.
हांगचे थळावे ह्यो गजाली गंभीरपणान घेतना दिसनात. तांच्या म्हणण्या प्रमाण, ‘हातांत बडी घेवन येवपाक जाय.’ मात प्रत्यक्षांत तातूंत बडयेय मातूय भियेनाशिल्लेय सुणे दिसून येतात.
असल्या ह्या सुण्यांचो अणभव पर्यटकांक खबर नाशिल्ल्यान, सुणे तांचेर अचकीत हल्लो करतात. हल्ल्या वेळार एक तर तांकां आपलो जीव वाटोवपाक दर्याच्या उदकात उडी मारची पडटा ना जाल्यार त्या सुण्यांचे शिकार जावचें पडटा. संबंदीतांनी ह्यो गजाली गंभीरपणान ताचेर वेळार तोडगो काडपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
