भांगरभूंय | प्रतिनिधी
पेडणें: मोरजी पंचायतीची ग्रामसभा सरपंच विलास मोरजे हांचे अध्यक्षते खाला जाली. ह्या वेळार मोरजी पंचायत वाठारांतल्या रस्त्यां कुशीक व्हडा प्रमाणांत जावपी अतिक्रमण, पार्कींग वेवस्था, गांवांत वता थंय सिसीटीव्ही कॅमेरे, स्मार्ट मिटर पुरायेन विरोध, पंचायत वाठारांत आनीक बांदकाम अश्या विवीध विशयांचेर चर्चा जाली.
ह्या वेळार ग्रामसभेक उपसरपंच सुप्रिया गडेकार, पंच मुकेश गडेकार, पंच सुरेखा शेटगांवकार, पंच रजनी शिरोडकार, पंच मंदार पोके, पंच फटू शेटगांवकार, पंच स्वप्निल शेटगांवकार आनी हेर हाजीर आशिल्ले.
सुरवातेक सरपंच विलास मोर्जे हांणी सगल्यांक येवकार दिलो. जाल्यार पंचायत वांगडाी धावुस्कार हांणी फाटले सभेचो इतिवृत्तांत वाचून दाखयलो.
हे ग्रामसभेंत मांडिल्ल्या प्रस्न, थारावांचेर कार्यवाही कित्याक जायना? असो प्रस्न तुकाराम शेटगांवकार हांणी केलो. जर थाराव मंजूर जावन ताची कार्यवाही जायना जाल्यार ह्यान फुडें थाराव घेवचोच न्हय. तशेंच मोरजी पंचायत मंडळांनी कितल्यो बांयों उसपपाचें काम केलें? ताचेर कितलो खर्च आयलो? अशेंय प्रस्न केले. ह्या प्रस्नांक जाप दितना सरपंच विलास मोरजे हांणी, आजूनय काम सुरू आसा. कितलो खर्च जाला हाचो तपशील सादर करतले अशें सांगलें.
सीसीटीव्ही बसयिल्ल्यान ग्रामस्थांमदीं समाधान
पंचायतीन फुडाकार घेवन पुराय मुखेल जंक्शनाचेर सीसीटीव्ही बसोवपाची प्रक्रिया सुरू केल्या. हाका लागून जे कोण रस्त्या कुशीक नो पार्किंग झोनांत वाहनां पार्क करतात, गैर काम करतात, तें दिसले उपरांत संबंदीत खात्या कडेन तश्यो कागाळी दिवन कार्यवाही करतले, अशें सरपंच विलास मोर्जे हांणी सांगलें.
जनार्धन शेटगांवकार हांणी सांगलें, हे ग्रामसभेंत मोरजी पंचायत वाठारांत व्हडा प्रमाणांत बांदकामां उबीं रावतात. ह्या बांदकामांक विरोध ना. मात फुडाराक मोरजे पंचायत वाठाराक आनीक कितलीं बांदकामां सोंसपाची तांक आसा. हाचो अभ्याच पंचायतीन केला काय? जर करूंक ना जाल्यार तज्ञां कडल्यान तसो अहवाल दिवचो, अशी मागणी ह्या वेळार केली.
स्मार्ट मिटराक खर विरोध
हे ग्रामसभेंत सरकारान सध्या स्मार्ट मिटर बसोवपाची येवजण राबयल्या. हाका मोरजे वाठारांतल्यान खर विरोध आसतलो. मोरजे गांवां खातीर स्मार्ट मिटर नाकात. जांणी हे स्मार्ट मिटर बसयल्यात तांकां डबल बील आयलां. ह्या मिटराक लागून कसलीं कसलीं आडमेळीं येतात, हाचेरूय ग्रामस्थांनी सविस्तर म्हायती दिली.
रस्त्यावेले अतिक्रमण केन्ना काडटलें?
सरकारान रस्ते रूंदकरापचो यत्न केला. मात रस्त्या कुशीक जीं बांदकामां उबीं आसात तांकां कोणाचोच विरोध ना. मात जे बांधकाम करतात ताञणी रस्त्या कुशीक आपली जागा पार्किंगसा खातीर आरक्षीत दवरपाची गरज आसा. अशें पंचायत मंडळांन रस्त्याच्या कुशीक पासय मारून संबंदीतांक कळोवचें, अशी मागणी ग्रामस्थांनी केली. हाचेर सरपंच विलास मोर्जे हांणी, उच्च न्यायालयाच्या आदेशा प्रमाण रस्त्याच्या कुशीक जीं बांदकामां आसात आनी बांदकामां करून अतिक्रमण जालां, ताचो अहवाल सादर करतले. ताचे उपरांत कारवाय जातली, अशी म्हायती तांणी दिली.
पंचांनी राजिनामे दिवचे
कांय ग्रामस्थ काम नासताय सरपंचाच्या केबिनांत वरांचीें वरां बसून आसता. हाका लागून हेरांत ताचो त्रास जाता. हें अशेंच चालू उरल्यार पंच-सरपंचांनी आपल्या पदाचो राजिनामो दिवचो, अणी मागणी करपी लेखी थाराव एका नागरिकांनी सादर केला. मात तो संबंदीत नागरीक हाजीर रावूंक नाशिल्ल्यान हाचेर चर्चाय जाली.
नो पार्किंग झोन असतना य थंय व्हडा प्रमाणांत वाहनां पार्कींग केल्ली आसतात. हाचेर कारवाय जावची, अशी मागणी सोनू केशव शेटगांवकार हांणी केली.
तुकाराम शेटगांवकार हांणी विकास समिती आनी गार्बेज समितीच्यो बसको वेळार कित्याक जायनात? असो प्रस्न केलो.
मयूर शेटगांवकार हांणी विवीध विशय ग्रामसभे मुखार सादर केले. जे रस्त्या कुशीक अतिक्रमण करतात. तांकां पंचायत कित्याक परवाने दिता? असो प्रस्न मयूर शेटगांवकार हांणी हाजीर केलो. निमाणे पंचमुकेश गडेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
