मोरजी कांसव संवर्धन वाठाराची संबंदीत अधिकाऱ्यांनी केली पळोवणी

मोरजे कांसव संवर्धन मोहिमेच्या वाठारांत पळोवणी करतना अधिकारी. (निवृत्ती शिरोडकार)

भांगरभूंय | प्रतिनिधी

पेडणें: मोरजी आश्वें मांद्रें दर्यादेगे वयल्या संवेदनशील वाठारांत कांसव संवर्धन मोहीम चालीक लायल्या. पूण पर्यटन मोसमांत संगीत कार्यावळींक लागून जावपी आवाज प्रदुशणाचो कांसवांच्या संवर्धनाचेर कसो परिणाम जाता, ताचो अहवाल 31 मार्च मेरेन सरकारान सादर करची, असो आदेश उच्च न्यायालयाच्या गोंय खंडपिठान दिला. ताका लागून 16 मार्चाक पेडणें उपजिल्होधिकारी दीपक वायंगणकार, पेडणें पुलीस निरिक्षक दत्ताराम रावत, रान विभाग अधिकारी परेश परब, तुकाराम खरबे, आरएफओ रानवटी जीव राजेंद्र फातर्पेंकार, आरएफओ पेडणें संयोग पेडणेंकार, रावंड फॉरेस्टर, मरीन मोरजी गोपीनाथ भोसले, रानरक्षक मरीन, मोरजी, संजय बेतकेकार रान रक्षक मरीन, मोरजी, दिगंबर परब, धनंजय नायक, सूर्यकांत चोडणकार, दीपक नायक, अभियंते गौरी सावंत, अभियंते येसली परेरा, चंद्रशेखर परब, अबकारी निरिक्षक विभूती शेट्ये, कमलेश माजजी, परेश परब आनी हेर अधिकाऱ्यांनी त्या वाठाराची पळोवणी केली. मोरजी पंचायत वाठारांतल्या तेंबवाडो आनी आश्वें मांद्रे दर्यादेगेर कांसव संवर्धन मोहीम चलयतात. हालींच दर्यादेग वाठारांत आवाजाचें प्रदुशण करपी संगीत कार्यावळींक लागून कांसव संवर्धन मोहिमेचेर वायट परिणाम जाला, अश्यो कागाळी आसात. हाची उच्च न्यायालयाच्या गोंय खंडपिठान दखल घेतल्या. ते संबंदांत संबंदीत सगळया खात्यांच्या अधिकाऱ्यांनी 31 मार्च मेरेन अहवाल दिवचो, असो आदेश दिला, अशी म्हायती अधिकारी परब हांणी दिली.