भांगरभूंय | प्रतिनिधी
60 हजार रुपया मोलाचे चार मोबायल जप्त
पणजी: होंडा सिटी मोटारीचो वापर करून मोबायल चोरी करपी चोराक पणजी पुलिसांनी नियोजनबद्द पद्दतीन अटक केली. ह्या प्रकरणांत पुलिसांनी बंगळुरू हांगासरलो कबीर रिझवान (26) हाका अटक करून ताचे कडल्यान 60 हजार रुपया मोलाचे चार मोबायल जप्त केल्यात. तशेंच पुलिसांनी चोरये खातीर वापरिल्ली होंडा सिटी मोटारूय जप्त केल्या.
पणजी पुलिसांनी दिल्ले म्हायती प्रमाण, कोझीकोड केरळ हांगासरलो प्रसाद के. के. हाणें कागाळ दाखल केल्ली. ते प्रमाण कागाळदार मंगळारा 12 वेर सकाळीं 6 वरांचेर पोरण्या सचिवालयाचे कुशीक आशिल्ल्या बस स्टॉपार उबो आशिल्लो. ह्याच वेळार एक मनीस ताचे मुखार आयलो आनी ताणें कागाळदाराच्या बोल्सांत दवरिल्लो 25 हजार रुपया मोलाच्या मोबायलाची चोरी केली. उपरांत चोरान होंडा सिटी मोटारीन पळ काडिल्ल्याचें कागाळींत म्हणलें.
ह्याच वेळार पुलिसांक दुबाविताची म्हायती मेळ्ळी. ते प्रमाण उत्तर गोंय पुलीस अधिक्षक अक्षत कौशल आनी उपअधिक्षक सुदेश नायक हांच्या मार्गदर्शना खाला पुलीस निरिक्षक विजयकुमार चोडणकार हांच्या फुडारपणा खाला उपनिरिक्षक दिपेश शेटकार, हवालदार विनीत कुट्टीकार, कॉन्स्टेंबल ईर्मिया गुरैया हांचो पंगड तयार करून तपास सुरू केलो.
पंगडान दुबावती कबीर रिझवान (26) हाका अटक करून ताचे कडल्यान 60 हजार रुपया मोलाचे चार मोबायल जप्त केले. तशेंच पुलिसांनी दुबावितान चोरये खातीर वापरिल्ली होंडा सिटी मोटार जप्त केली.
ह्या प्रकरणांत पुलीस निरिक्षक विजयकुमार चोडणकार हांच्या मार्गदर्शना खाला पुलीस हवालदार विनीत कुट्टीकार हांणी अनवळखी मनशा आड गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
