भांगरभूंय | प्रतिनिधी
हांव सगळ्यांकच म्हणना. पुण, अशेय पालक आसात ते मोबायलार वरांची वरां काडटात. ते आपल्या भुरग्यांक कशे सांगतले तुमी मोबायल फोन चड वापरू नाकात म्हणून.
ते तिगुय इश्ट णववी, धावी यत्तेन शिकता आसतले. आमच्या घरा मुखा वेल्यान हातान मोबायल फोन घवन सकाळ, सांज वताले. केन्ना दनपरां तर केन्ना सकाळीं फुडेंच दिसभर हांसतना, चिकुळतना दिसताले. एकटो मदीं आनी दोगजाण ताच्या खांदार हात घालून चलताले. मदल्याच्या हातांतल्या मोबायलार नदर थीर करून पळयतना किट्किट्टाले.
अशें कितें पळयताले तर ते मोबायलार? केन्ना केन्ना चार- पांच जणांचो पंगड त्या पडींग घराच्या भितोडेक फातरार बसून वरांची वरां मोबायल पळयत हासताले, फुतफुतताले, किट्किट्टाले. आता तर चवथी आनी पांचवी यत्तेचीं भुरगीं हक्कान हातान ते स्मार्ट फोन घेवन भोंवतना दिसतालीं. तांच्या मोबायलार तांचो फोटो आयकोन जावन हांसतालो. चोरयां अॅप डावनलोड करून गेम खेळटना दिसतालीं.
म्हजीं नात शनाया तीन वर्सां स म्हयन्यांची आसा. टिवीचेर एक कार्टून एड लागल्या ती पळोवन आपल्या पापाक म्हणटा “पापा ते तुज्या मोबायलार डावनलोड करून म्हाका पळोवंक दी”. कितें आमचीं भुरगीं आता खेळ, वाचन, बरोवप सगळें विसरतलीं? कितें आतां लेखक, कवी जावंक पावचेचनात? हात- पांय आसून हीं भुरगीं पांगळीं कशी भितोडेंक आनी घरान बसूनच रावतलीं?
मोबायलार सगळें पळोंवक मेळटा. तें तांका जाय तें पळयतलेंच, पुण अतीप्रमाणान पळोवन आपले दोळें आनी तकली पेड्यार करून उडयतलीं. नाका ते विचार तांचे तकलेन घोळत रावतले. प्रस्नांच्यो जापो तीं मोबायलार सोदतलीं. हांव सगळ्यांकच म्हणना. पुण, अशेय पालक आसात ते मोबायलार वरांची वरां काडटात. ते आपल्या भुरग्यांक कशे सांगतले तुमी मोबायल फोन चड वापरू नाकात म्हणून.
आवय- बापुय भायर ऑफिसान कामाक वतात. भुरग्यांक आॅनलायन शिकपाक मोबायल फोन दिवचोच पडटा. तांकां घेवन दिल्या मोबायलार “म्हजो नवो मोबायल” म्हणत तांचो स्टेटस पळोवंक मेळटा. स्वता अॅप डावनलोड करून पयस इश्टा वांगडां घरांत बसुनच पब्जी गेम खेळटा. आनी आवय बाबडी लोकांची आयदनां घासूक घरांघरांनी भोंवता. हें पळयतकीर एकूच प्रस्न पडटा, ह्या भुरग्यांचो फुडार कितें?
सौ. शोभा फुलकार,
पणजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
