भांगरभूंय | प्रतिनिधी
पेडणें, प्रतिनीधी : मोपांतल्या गांवठण वाड्यावेलो एक नागरीक आत्माराम राजाराम परब हांच्या घराचेर वीज खात्याच्या दक्षता खात्यान धाड घाली. तांणी वीज चोरी केल्ले खातीर खात्यान सुमार ६ लाख ४८ हजार ६४४ रुपयांचो दंड तांकां दिला.
हे विशीं चड म्हायती प्रमाण, एकल्यान मोपांतल्या वीज कर्मचार्याची वीज खात्याच्या दक्षता खात्या कडेन चोरुन वीज वापरता अशी कागाळ केल्ली. ते प्रमाण दक्षता अधिकार्यान २० जुनाक त्या मनशाच्या घरा कडेन वचून तपासणी केली. मात थंय तांकां कांयच सांपडूंक ना. उपरांत ते थंय रस्त्या लागसारा आशिल्ल्या बंगल्यांत गेले. त्या बंगल्याची तपासणी केली तेन्ना तळ माळये वेल्यान बायपास करून वीज प्रवाह वयले माळयेर व्हेल्ल्याचें निदर्शनाक आयलें. दक्षता अधिकार्यांनी घर धनी आत्माराम परब हांकां ताब्यांत घेवन पुराय घराची तपासणी करतले अशें सांगलें आनी हे विशींची म्हायती मोपा पुलीस स्टेशनाक दिली.
ते प्रमाण मोपा पुलिसांचो एक पंगड घडणुके सुवातेर दाखल जालो. पुलिसांचे हाजेरींत पुराय बंगल्याची तपासणी केली. तेन्ना आत्माराम परब हांच्या घराचे तळ माळयेर वीज कनेक्शनाचो मिटर बाॅक्स आसा. थंयच्यान चोरयेच्या मार्गान वयले माळयेर कंसीलींग करुन बायपासा वरवीं वीज पुरवण केल्ली. हे माळयेर चार पांच एसी आनी म्हारग लायटीचीं उपकरणां वापरताले. विंगड विंगड तरेच्यो ल्हान व्हड मोटरीज आनी घरांत वापरपी जायती लायटीचीं उपकरणां वापरताले.
ह्या बायपासाक लागून फकत तळ माळेचेर वापरपी वीजेचो मिटर रीड जातलो आनी तळ माळयेर उणीं उपकरणां आशिल्लीं. लायटीचो चड वापर वयले माळयेर जातालो. जाचें रिडींग जायच नाशिल्लें. वयले माळये वयली लायट फुकट वापरप जातालें. पुराय घराची तपासणी करून दक्षता अधिकार्यांनी पुराय घराचें लायटीचें कनेक्शन सील केलें. तशेंच आत्माराम परब हांकां विजेची चोरी केल्ले खातीर सुमार ६ लाख ४८ हजार ६४४ रुपयांचो दंड दिलो. हो दंड एका वर्सा भितर भरिना जाल्यार मुखार ताची चवकशी करून फुडली कारवाय करतले.
हे चवकशें आत्माराम परब हे ह्या घरांत केन्नाच्यान रावतात, तांकां वीज पुरवणे खातीर गरजेचे आशिल्ले दाखले कोणी दिले, विजेचें हें फटीचें काम कोणी केलां हाची चवकशी करून फुडली दंडात्मक कारवाय जातली.
ह्या वाठारांत ही वीज चोरयेची पयलीच घडणूक. सामान्य मनशान विजेचें बील अर्थीक लुकसाण आनी हेर खंयच्याय कारणाक लागून भरूंक ना जाल्यार तांकां रोखड्योच नोटीस धाडटात. लायट बंद उडयतात. खंयच्याय कुटुंबान घर वाडयल्यार आनी तांकां उणें बील आयल्यार चवकशी करतात. मात ह्या बंगल्यांत म्हारग विजेचीं उपकरणां भायल्यान दिसून लेगीत फाटलीं कितलींशींच वर्सां सामकें उणें बील कशें येता हाची आजूनय चवकशी कित्याक करूंक ना, असो प्रस्न नागरिकांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
