भांगरभूंय | प्रतिनिधी
पणजी, प्रतिनिधी : मोपा विमानतळा खातीर उगवें, तांबोसे, वारखंड ह्या गांवांतल्या शेकड्यांनी लोकांक जमनी प्रकल्पा खातीर दिवच्यो पडल्यो. हांतूतल्या काय जाणांक लुकसाण भरपाय मेळ्ळ्या जाल्यार काय जाणांचे दावे प्रलंबित आसात. लुकसाण भरपाय मेळून हेर कसलोच वाद नाशिल्ल्या लोकांक जमीन वगडायिल्ल्याच्या प्रमाणपत्रा खातीर अर्ज करपाक दोन म्हयन्यांची मुजत मेळ्या. आयज सावन दोन म्हयने म्हळ्यार 20 नोव्हेंबर मेरेन संबंदीत अधिकाऱ्या कडेन अर्ज करचे पडटले.
मोपा विमानतळ खासा जमीन संपादन अधिकाऱ्यान हे विशींची नोटीस जारी केल्या. दोन म्हयन्या उपरांत अर्ज केल्यार तांचो विचार जावचो ना, अशें स्पश्ट केलां. मोपा विमानतळा खातीर ज्या लोकांच्यो जमनी गेल्या तांका मोपा विमानतळाचेर नोकरी तशेंच हेर सुविधां मदीं प्राधान्य दिवपाचें धोरण आसा. हाका लागून विमानतळा खातीर जमीन वगडायिल्ल्यांचे प्रमाणपत्र गरजेचें. कांय जाणांक हाचे पयलीं जमीन वगडायिल्ल्याचें प्रमाणपत्र मेळ्ळां. बऱ्याच जाणांनी प्रमाणपत्रा खातीर अर्ज करूंक ना. तांकां आतां अर्ज करपा खातीर दोन म्हयन्यांची मुजत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
