भांगरभूंय | प्रतिनिधी
बावनकुळे : महाराष्ट्र हद्दींतल्या जमीन खरेदीची चवकशी
भांगरभूंय । प्रतिनिधी
मुंबय/पणजी : गोंय महाराष्ट्र शिमे वयल्या मोपा आंतरराष्ट्रीय विमानतळा लागसार महाराष्ट्राचे हद्दींतल्या फाटल्या तीन वर्सांतल्या जमीन वेव्हाराची खोलायेन चवकशी करपाचे आदेश महसूल विभागान दिल्या. कूळ कायदो मोडून शेतकार नाशिल्ल्या व्यक्तींक शेतकी जमीन खरेदी केल्या अशें दिसल्यार संबंदीत जमनी ताब्यांत घेतले, अशी म्हायती महाराष्ट्राचे महसूल मंत्री चंद्रशेखर बावनकुळे हांणी विधानसभेच्या पावसाळी अधिवेशनांत दिली.
बावनकुळे हांणी सांगलें, मोपा विमानतळाच्या वाठारांत परप्रांतीय बिल्डरांनी व्हड प्रमाणार जमनी खरेदी केल्ल्याची म्हायती सरकाराचे नदरेक आयल्या. महाराष्ट्रांतल्या कूळ कायद्या प्रमाण फक्त शेतकारूच शेतकी जमीन खरेदी करपाक शकता. ताका लागून फाटल्या तीन वर्सांतल्या सगल्या जमीन वेव्हारांची खोलायेन चवकशी करपाचे आदेश कोंकण विभागीय आयुक्तांक दिल्यात.
मोपा आंतरराष्ट्रीय विमानतळ सुरू जाले उपरांत वाठारांतल्या जमनींचे दर गतीन वाडल्यात. व्हड प्रमाणाचेर गुंतवणूकदारांनी जमीन खरेदी केल्ल्याचे फाटभुंयेर खूबश्या वेव्हारा संबंदांत दुबाव उक्तायताले. चड करून शेतकार नाशिल्ल्या व्यक्तींनी कूळ कायदो मोडून जमनी खरेदी केल्ल्याच्यो कागाळी सरकारा कडेन पाविल्ल्यो. ते उपरांत महसूल विभागान ह्या प्रकरणाची गंभीर दखल घेवन चवकशीचे आदेश दिले.
हे चवकशे खातीर कोंकण विभागांतल्या दोनूय जिल्होधिकाऱ्यांचो समितींत आस्पाव केला. संबंदींत व्यक्तींचीं नांवां आनी वेव्हारांचो तपशील आशिल्लो कृती अहवाल (एटीआर) तीन म्हयन्यांत सादर करतले. ते उपरांत तो विधानसभेंत लेलगीत सादर जातलो. चवकशेंत कूळ कायदो मोडून जमीन खरेदी जाल्ल्याचें सिद्ध जालें जाल्यार संबंदीत जमनी सरकार ताब्यांत घेतलें, अशीय शिटकावणी बावनकुळे हांणी दिल्या.
कायदो मोडला जाल्यार खर कारवाय
चवकशेंत कूळ कायदो मोडिल्ल्याचें सिद्ध जालें जाल्यार संबंदीत जमनी सरकार ताब्यांत घेतलें, अशें बावनकुळे हांणी म्हणलां. हे कारवायेक लागून मोपा विमानतळ वाठारांतल्या कथीत बेकायदेशीर जमीन वेव्हार उक्तडार येवपाची शक्यताय आसा. फुडारांत अश्या वेव्हारांक आळाबंद येवपाक मजत जातली, अशी आस्त उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
