भांगरभूंय | प्रतिनिधी
पणजी: मनोहर आंतरराष्ट्रीय विमानतळ आनी गुजरातांतल्या मुंद्रा (एमडीए) हांचे मदीं स्टार एरची नवी नॉन स्टॉप विमान सेवा सुरू जाल्ल्यान गोंयच्या हवाई संपर्काक आनीक उर्बा मेळ्ळ्या. ही सेवा सप्तकांतल्यान पांच फावटीं मंगळारा ते शेनवारा मेरेन चलतली.
नव्या थेट जोडणीक लागून गोंय आनी गुजरात हांचे मदीं अतिरिक्त प्रवासाची सोय उपलब्ध जाल्या. हाका लागून पर्यटनाक आनीक सुवीधा मेळटली, वेवसायीक संबंद घटमूट जातले आनी गोंय आनी गुजरांत हांचे मदीं अर्थीक आदान-प्रदानाक आदार मेळटलो.
गोंय – मुंद्रा सेवा सुरू जाल्ल्यान राज्या कडेन हवाई जोडणीचो विस्तार चालू आशिल्ल्याचें दिसून येता, प्रवाशांक आनीक एक सोयीस्कर प्रवास पर्याय मेळटा आनी तेच बरोबर गोंयच्या वर्सभर भोंवडेकारांक आकर्शीत करपाच्या यत्नांक आदार मेळटलो, अशें पर्यटन मंत्री रोहन खंवटे हांणी म्हणलें.
“दरेक नवो हवाई मार्ग गोंयचो पर्यटन वाठार वाडोपाक मजत करता आनी देशभरांतल्या प्रवाशांक सोय उपलब्ध करता, अशें पर्यटन संचालक केदार नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
